Москва најави 32-часовен прекин на огнот по повод Велигден, кој треба да започне на 11 април. Кијив реагира внимателно, нагласувајќи дека секое примирје има смисла само ако е вистинско, одржливо и проверливо.
Украина изрази подготвеност за взаемни чекори околу велигденското примирје најавено од руска страна, но реалноста на теренот покажува дека војната продолжува со несмален интензитет, додека утринава низ земјата повторно одекнуваа сирени за воздушна опасност.
Претседателот Володимир Зеленски ја повтори позицијата на Украина, поврзувајќи го прекинот на огнот со пошироките дипломатски перспективи:
„Украина повеќепати изјави дека е подготвена за взаемни чекори. Предложивме прекин на огнот за време на велигденските празници оваа година и ќе постапуваме соодветно. На луѓето им треба Велигден без закани и вистинско придвижување кон мирот, а Русија има шанса да не се врати на нападите ни по Велигден.“
Зеленски, исто така, изјави дека прекинот на огнот секогаш создава можности за дипломатија во процесот што води кон вистински крај на војната.
„Прекинот на огнот секогаш создава повеќе можности за дипломатија и треба да му претходи на вистинскиот крај на војната. Украина отсекогаш ѝ пристапувала на оваа војна од таа позиција“, изјави украинскиот претседател.
Министерот за надворешни работи на Украина, Андриј Сибига, беше уште поексплицитен:
„Нашата позиција е дека воопшто нема потреба од повторно започнување на нападите. Траен прекин на огнот би го отворил патот за вистинска дипломатија со цел да се стави крај на оваа војна, во која Русија никогаш нема да победи и која конечно мора да ја запре.“
Амбасадорката на Украина во Северна Македонија, Лариса Дир, ја пренесе истата порака, но и реалноста од теренот.
„Велигденското примирје е можност за Украинците да ги поминат празниците без експлозии и терор. Украина е подготвена за взаемни чекори. Но вистинскиот мир започнува со тишина што не завршува по празниците. За жал, денешното утро веќе започна за Украинците со воздушна тревога“, објави амбасадорката Дир денеска.
И покрај најавите за примирје, на 10 април низ повеќе региони на Украина беа активирани воздушни тревоги, што јасно покажува дека борбените дејствија продолжуваат, а најавеното примирје сè уште не е стапено во сила.
Велигденското примирје е можност за Украинците да ги поминат празниците без експлозии и терор. Украина е подготвена за взаемни чекори. Но вистинскиот мир започнува со тишина што не завршува по празниците. За жал, денешното утро веќе започна за Украинците со воздушна тревога. pic.twitter.com/lZoyklDnbm
— Larysa Dir (@dir_larysa) April 10, 2026
Во објава на социјалните мрежи, Украинската Државна служба за вонредни состојби (ДСНС) од Донечката област известува дека руските напади продолжуваат да предизвикуваат пожари, разурнувања и оштетувања дури и на спасувачката инфраструктура, додека тимовите интервенираат под постојана закана од нови удари.
Искуството од претходните обиди за привремени прекини на огнот ја храни скепсата во Кијив. Украинските власти во повеќе наврати документираа дека ваквите најави не значат и вистинско запирање на нападите.
Велигденското примирје доаѓа во момент кога фронтот останува интензивен, но без битни промени, а двете страни водат исцрпувачка војна на трошење ресурси и време.
Украина сè поинтензивно користи далекуметни дронови и прецизни удари, додека Русија продолжува со ракетни и беспилотни напади врз инфраструктура и цивилни цели.
Позицијата на Украина останува непроменета. Примирјето има вредност само ако прерасне во траен прекин на огнот и вистинска дипломатија.
М. Д.
