Редакцијата на медиумската платформа на ЦИВИЛ им испрати покани за интервју на градоначалничките и градоначалниците на сите општини низ целата земја на кои ќе разговара за теми поврзани со антинационалнизмот, социјалната правда, зелените вредности, како и актуелната политичка состојба, европските вредности и ЕУ интеграции.
Интервјуото со градоначалникот на Свети Николе, Сашо Велковски е прво од серијата интервјуа што ќе бидат објавени на медиумската платформа на ЦИВИЛ.
Зелен ЦИВИЛ: Кои се зелените перспективи на вашата општина?
Велковски: Кога зборуваме за зелени перспективи на една општина, веднаш на мисла ни е пред се екологијата и заштита на животната средина, односно комунална хигиена, сузбивање на дивите депонии во општината, навреме собирање на комуналниот отпад и секако заштита на сите речни корита во општината од нивно загадување. Во таа насока е и моето размислување за зелените перспективи на нашата општина во поставување канализациони мрежи во сите населени места, прочистување на отпадните води и функционирање на пречистителната станица за отпадни води која ја пуштивме оваа година во функција после 13 години неработење, меѓутоа и поставување на пречистувачи за отпадните води во селата. Во контекст на ова би го додал и собирањето на комуналниот отпад од сите населени месте и нивна дистрибуција на моменталната депонија за отпад. Свети Николе е општина каде веќе е направена стратегија за одлагање на комуналниот отпад од два региони, Источниот и Северно-источниот плански регион, а според најавите преку европски пари во наредниот период ќе треба да се изгради фабрика за преработка на комуналниот отпад која треба да се гради на територијата на општина Свети Николе, односно до с. Мечкуевци.
Јас би додал и уште нешто што се однесува до зелените перспективи на нашата општина, тоа е искористувањето на природните ресурси со кои располага нашата општина, а тоа се ветерот и сонцето, односно привлекување на инвестиции во поставување на фотоволтаични централи и ветерници со кои ќе ја зголемиме енергетската ефикасност на нашата држава и ќе ги намалиме емисиите на штетни гасови во атмосферата кои ги испуштаат термоцентралите.
Секако на ова ќе се надоврзам со реализација на проектот за гасификација на општината и задоволување на потребите на фирмите што користата ц – врсти и течни горива за нивните стопански капацитети. На тој начин, сметам дека ќе влијаеме на намалување на емисијата на штетни гасови во атмосферата.
Зелен ЦИВИЛ: Кога говориме за зелените вредности, познато е дека тие не се однесуваат само на заштитата на животната средина која, пак, често се меша со поимите поврзани со комуналната хигиена. Зелените вредности подразбираат почитување на човековото достоинство, што подразбира и социјална правда и антинационализам, стратегии за одржлив развој, што подразбира напуштање на принципите на либералниот капитализам… Колку, според Вашите анализи, знаат политичарите во нашата земја?
Велковски: Борбата за социјална правда и антинационализмот се наше секојдневие и секоја влада прави напори истите да ги доведе во состојба како што доликува на една демократска држава, односно решавање на проблемите што од нив потекнуваат. Не оди лесно, но мое мислење е дека со една добро направена стратегија за одржлив развој и секако нејзна имплементација, со зголемување на бројот на домашни и странски инвестиции и отварање на нови работни места, тоа ќе се постигне. Верувам дека со членството во НАТО и претпристапните преговори со ЕУ, веќе наредниот период ширум ќе бидат отворени вратите за влез на што поголем број на инвестиции, а со тоа и зголемена стапка на вработеност, поголеми плати на вработените и покачување на животниот стандард на граѓаните.
Зелен ЦИВИЛ: Вашиот став за растечките политички и етнички мотивирани тензии вонашата земја? Кому одат во прилог, а кој губи?
Велковски: Растечките политички и етнички тензии во државата никому не одат во прилог. Република Северна Македонија е мултинационална држава, каде живеат различни етноси, со различни култури, традиции, верска определба. Токму тука треба да ја црпиме енергијата за да одиме понатаму, односно да бидеме сплотени како никогаш досега, посебно денес кога се очекува да бидеме дел од уште поголемо семејство наречено ЕУ. Денес кога сме на прагот да го оствариме нашиот вечен сон, да бидеме рамо до рамо со едни од најразвиените земји во светот, можеме и мораме да биде заедно со цел да обезбедиме сигурна иднина на генерациите што доаѓаат. Верувам дека сме на прав пат наскоро сонот да стане јаве.
Зелен ЦИВИЛ: Што треба да се направи во овој поглед?
Велковски: Се знае нашата определба уште кога станавме самостојна држава, а тоа се НАТО и ЕУ. Јасно се дефинирани овие две стратешки цели. Една од нив веќе ја остваривме со станување на 30-та членка на НАТО, со седење рамо до рамо со најразвиените земји во светот, што од друга страна значи стабилност на нашата држава, нашите граници. Не очекува напорна работа со претпристапните преговори со ЕУ. Затоа мораме да ги засукаме ракавите, да работиме напорно, да реализираме голем дел од реформите што ги ветивме на ЕУ и да ги почитуваме принципите, регулативите и вредностите на сите земји членки на ЕУ. Нема да биде лесно, но кога имаме јасна визија за тоа каде сакаме да се движиме, тогаш истата можеме полесно да ја оствариме.
обработка на текст: Б. Јордановска
