Владата на Венецуела соопшти дека опозицискиот претседателски кандидат Едмундо Гонзалез ја напуштил земјата и побарал азил во Шпанија. Гонзалез се криеше откако беше издаден налог за негово апсење во моменти кога опозицијата ги оспори резултатите од претседателските избори во јули – на кои Државниот изборен совет (CNE), контролиран од владата, го прогласи Николас Мадуро за победник.
Потпретседателката на Венецуела Делси Родригез напиша на социјалните мрежи дека Гонзалез „доброволно“ побарал засолниште во шпанската амбасада во Каракас и побарал од шпанската влада политички азил.
Шпанскиот министер за надворешни работи Хозе Мануел Албарес изјави дека Гонзалез ја напуштил земјата на негово барање, и тоа со авион на шпанските воздушни сили.
Тој додаде дека шпанската влада е посветена на политичките права на сите Венецуелци.
Адвокатот на Гонзалез потврди дека тој ја напуштил земјата за Шпанија, но не даде повеќе детали.
Додека заминувал, венецуелските безбедносни сили ја опколиле аргентинската амбасада во главниот град Каракас. Таму се кријат шест политички противници на претседателот Мадуро. Министерството за надворешни работи на Венецуела објави дека внатре се подготвуваат терористички акти.
Венецуела е во политичка криза откако властите го прогласија претседателот Мадуро за победник на изборите на 28 јули.
Опозицијата тврди дека има докази дека Гонзалез победил со убедливо мнозинство и објави детални резултати од гласањето на интернет, кои сугерираат дека Гонзалез убедливо го победил Мадуро.
Многу земји, вклучувајќи ги САД, Европската Унија и неколку земји од Латинска Америка, одбија да го признаат Мадуро како победник сè додека Каракас не ги објави деталните податоци од гласањето.
Владата на Мадуро приведе повеќе од 2.400 лица од изборите досега, создавајќи, како што ОН го нарекуваат, „клима на страв“. /МИА
