Претседателот на САД, Џо Бајден и потпретседателката Камала Харис, синоќа ги пречекаа Американците кои беа ослободени од руски притвор, вклучително и новинарот на Волстрит журнал Еван Гершкович, во заедничката база Ендрјус во Мериленд.
„Нивните брутални искушенија завршија и тие се на слобода“, рече Бајден претходно истиот ден.
Според Њујорк тајмс, комплексниот договор за нивното ослободување, кој дојде по детални преговори во кои беа вклучени седум земји, претставува дипломатска победа за Бајден, кој долго време ветуваше дека ќе ги врати затворените Американци дома. Вкупно 16 луѓе беа ослободени од Русија, а во замена, осум лица беа ослободени од Западот, пренесува.
Како што пренесува Си-ен-ен, повратниците беа пречекани со солзи и прегратки од нивните радосни семејства во заедничката база Ендрјус во Мериленд, каде што претседателот Џо Бајден и потпретседателката Камала Харис исто така беа на пистата за да ги пречекаат откако нивниот авион слета 20 минути пред полноќ во четвртокот.
Вилан, кој прв излезе од авионот, поздрави пред да се ракува со американските лидери, а потоа и Гершкович, кој ги прегрна и Харис и Бајден пред да ги прегрне неговите воодушевени родители. Курмашева се втурна во прегратките на сопругот и ќерките откако ги поздрави Харис и Бајден.
Во соопштението, семејството на Гершкович им се заблагодари на Бајден и на другите официјални лица што помогнаа да се обезбеди неговото ослободување по 16 месеци минати во руски затвор. Во воздухопловната база, откако излезе од авионот и разговараше со Бајден и Харис, Гершкович прегрна членка на семејството и ја подигна во воздух.
Аналитичарите сметаат дека клучот на договорот за Русија беше ослободувањето на атентаторот Вадим Красиков од германски затвор, што претседателот Владимир Путин долго го бараше.
„Русија усвои закон во 2006 година со кој формално дозволи вонсудско убивање во странство на оние што Москва ги обвинува за екстремизам и тероризам“, рече Нил МекФаркухар, известувач на Тајмс кој со години известува за Кремљ. „Во очите на Кремљ, атентатот на Красиков во Берлин на чеченскиот сепаратистички лидер кого Русија го означи како терорист беше легитимен“.
Меѓу ослободените Американци во најголемата размена на затвореници меѓу Русија и Западот од Студената војна беа Репортерот на „Волстрит журнал“, Еван Гершкович; руско-американска уредничка на Радио Слободна Европа/Радио Слобода, Алсу Курмашева која исто така беше уапсена минатата година; и Пол Вилан, поранешен маринец уапсен во 2018 година.
Во Русија договорот беше дочекан како триумф од поинаков вид за Путин, кој може да го искористи за да ја истакне својата лојалност кон руските агенти кои се уапсени во странство.
Драган Мишев
