Белата куќа соопшти дека прес-конференцијата на американскиот и украинскиот претседател Доналд Трамп и Володимир Зеленски е откажана.
Извор од Белата куќа потврди дека украинскиот претседател Володимир Зеленски предвреме ја напуштил Белата куќа. Информацијата доаѓа по жестоката расправија меѓу Трамп и Зеленски пред новинарите во Овалната соба.
Американскиот претседател Доналд Трамп напиша на социјалните мрежи дека украинскиот претседател Володимир Зеленски може „да се врати кога ќе биде подготвен за мир“.
Претходно, пред да одат на состанокот зад затворени врати, следеше кавга пред камерите и новинарите во Овалната соба, бидејќи Трамп го обвини Зеленски дека е неблагодарен за американската помош.
-Неверојатно е она што произлегува од емоциите, и јас утврдив дека претседателот Зеленски не е подготвен за мир доколку Америка е вклучена, бидејќи тој чувствува дека нашата вклученост му дава голема предност во преговорите, напиша Трамп на „Truth Social“.
-Не сакам предност, сакам мир. Тој не ги почитуваше Соединетите Американски Држави во Овалната соба. Може да се врати кога ќе биде подготвен за мир, додаде Трамп.
