Коалицијата ВЛЕН ја претстави својата платформа за реформа на локалната самоуправа, најавувајќи нов модел на децентрализација што предвидува поголема финансиска независност за општините, проширени надлежности и регионално инфраструктурно поврзување. Од коалицијата оценуваат дека досегашниот систем бил централизирано поставен и нефункционален, а локалните власти зависеле од политичката волја на централната власт.
Според нивната визија, општините треба да прераснат во институции со реална автономија, способни самостојно да носат развојни политики и да одлучуваат за приоритетите на граѓаните. ВЛЕН смета дека квалитетот на локалните услуги – од инфраструктурата до образованието – е директен показател за степенот на демократија во државата.
Во центарот на предложените реформи е фискалната децентрализација, односно обезбедување стабилни извори на приходи за општините и поголема контрола врз локалните буџети. Паралелно, коалицијата предлага и проширување на надлежностите на локалните власти, особено во основното и средното образование, како и во планирањето на локалниот економски развој.
Како еден од клучните стратешки проекти, коалицијата го издвојува патното поврзување меѓу Тетово и Призрен. Според ВЛЕН, овој проект не е само инфраструктурна инвестиција, туку обид за економско интегрирање на Полошкиот регион со Косово и поширокиот регион.
Во своите јавни настапи, претставниците на ВЛЕН упатија критики кон претходните власти, обвинувајќи ги дека со години ја запоставувале децентрализацијата и ги користеле општините како политички инструмент. Тие тврдат дека таквиот пристап довел до запуштена инфраструктура, недостиг на основни услуги и слаб локален развој.
Доколку предложените мерки добијат политичка поддршка, ќе бидат потребни сериозни законски измени, особено во делот на финансирањето на локалната самоуправа и распределбата на надлежностите меѓу централната и локалната власт.
Политичките аналитичари оценуваат дека успехот на ваквиот модел ќе зависи од способноста на општините да управуваат транспарентно со јавните средства и да изградат административен капацитет за преземање на новите обврски. Истовремено, процесот би можел да има влијание и врз евроинтеграциските процеси, бидејќи зајакнувањето на локалната демократија е дел од европските стандарди за добро управување.
Коалицијата ВЛЕН официјално се трансформираше во единствен политички субјект на 9 мај, на Конгрес на кој присуствуваа 850 делеагати и беше претставена нивната платформа.
ЦИВИЛ Медиа Деск
