Бојкот на продавниците поради високите цени на производите, поскапување на парното греење, низок стандард на граѓаните на Република Северна Македонија – владата најавува мерки, цените се зголемуваат, а дел од политичките партии бараат од власта да најде начин да се заштитат граѓаните од притисокот од се повисоките цени.
Новина во барањата е предлогот на ВМРО- Народна за бојкот на музичари од поранешна Југославија, за чии настапи кај нас, цените се движат околу 30.000 евра.
Економската комисија на ВМРО-Народна партија направи длабока анализа и притоа констатира дека во послендната година имаме драстично поскапување на музичките услуги, а со тоа како на концертните така и на билетите по дискотеките на сите музички групи од поранешна Југославија кои доаѓаат во нашата држава и притоа ги преполнуваат дискотеките и концертните сали, гласи соопштението на ВМРО-Народна.
Така на пример само за настап во дискотека на група или пејач поединец од бивша Југославија цената се движи околу 30.000 евра.
Затоа ВМРО-Народна партија предлага кон општиот бојкот на потрошувачите на македонските маркети да се додаде и бојкотот на сите овие настапи, со што на тој начин македонскиот потрошувач не само што ќе заштеди лично повеќе средства туку и ќе и помогне на македонската музика, а и на македонската економија во целина, се наведува во соопштението.
Од НСДП пак преку соопштение бараат од Владата наместо да се приклучуваат на граѓанскиот бојкот заради големата скапотија, да ги донесат неопходните мерки за да ги заштитат граѓаните и нивниот стандард, затоа што се повеќе семејства многу тешко опстануваат од први до први.
Скапоплатените советници во Владата очигледно не ја чувствуваат скапотијата, а ако не знаат кои мерки треба да ги предложат за да помогнат на граѓаните, нека ги разгледаат мерките со кои претходната влада успешно се справуваше со енергетската и економската криза и успешно се справи со кризата за снабдување со топллинска енергија во главниот град.
Исто така, НСДП бара Владата да не седи по страна, туку да биде медијатор помеѓу синдикатите и работодавачите и да поддржи покачување на минималната плата за да се помогне на работниците со најниски плати кои оваа скапотија најтешко ја поднесуваат.
Владата предводена од Мицкоски не е способна да ги менаџира состојбите во енергетскиот сектор иако формираа Министерство за енргетика, за кое најавуваа дека директно ќе ја следи работата на ЕСМ, посочија од НСДП.
Потпретседателката на СДСМ, Каја Шукова, предупреди дека поскапувањето на парното ќе доведе до нова еколошка катастрофа, бидејќи граѓаните ќе бидат принудени да користат алтернативни и многу поштетни извори на греење, што ќе го зголеми загадувањето.
Според неа, ова е директен удар врз семејните буџети, во време кога трошоците за живот експлодираат, а платите остануваат исти.
Премиерот и лидер на ВМРО -ДПМНЕ Христијан Мицкоски, денеска, еден ден по бојкотот на големите маркети по постојаното поскапување на основните прехранбени производи, изјави дека инспекторите се на терен во сите поголеми супермаркети, се прави детална анализа, при што според првичните сознанија она за што биле загрижени во однос на цените е всушност реалност, и најави повеќе детали за анализите од понеделник.
Д. Тахири
