ЏАБИР ДЕРАЛА
Во медиумите блиски до политичката десница, но и во оние што „се продаваат“ како неутрални и објективни, редовно се појавуваат прилози со наслови во кои се цитираат владините претставници. Браво, тоа може да се каже дека е напредок. Навидум, се работи за едноставно пренесување на информации, една секојдневна медиумска рутина. Но дали е навистина така?
Малку повнимателните читателки и читатели ќе забележат дека во тие медиумски прилози, сепак, има нешто повеќе. На пример, се пренесува дел од изјавата што има споредно значење, намерно и без неопходната обработка. Во насловот се става маргинален дел од информацијата или изјавата, а по можност се доведува во форма што, барем на прв поглед, изгледа апсурдно и погрешно. Во комбинација со фотографија на која цитираниот изгледа лошо или смешно, добиваме нешто повеќе од вест. Опишаната ситуација е типична за манипулативни и пропагандни медиумски прилози.
Пропагандата е најуспешна кога е невидлива
Медиумите се преполни со пропаганда „камуфлирана“ во вести. Градат имиџ на објективни и неутрални медиуми (што и да значи тоа), а спроведуваат суптилна и скриена кампања од која, практично, нема одбрана. Се однесуваат како огласна табла, со таа разлика што врз „огласите“ за политичките противници им се покриени со дебели дамки од кои човек посакува да го тргне погледот. Притоа, ја задржале својата политичка „неутралност“.
Со таквите медиумски прилози во кои се пренесуваат делови од изјави на начин што тие ништо не значат, се нанесува долготрајна и континуирана „тивка“ штета на политичкиот противник. Освен тоа, страда и вистински објективното информирање, односно се загрозува јавниот интерес. Воедно, „балансот“ е постигнат, објавени се „двете страни“ (власт и опозиција).
„Вмровска класика“ – ми вели пријателот екс-вмровец додека пиевме еспресо утринава на тврд скопски, кој морам да го преведам овде. „Сето тоа се смислува во партиска централа. Ништо не можеш да им кажеш, само тие кажуваат што и како треба да се мисли, зборува и пишува.“ Знам, му велам.
ПС. Познат факт: Пропагандата е најуспешна кога е невидлива.
