По вчерашниот, втор круг од локалните избори, според прелиминарните резултати што ги објави Централната изборна комисија, во Косово најголем број градоначалнички места освои „Српска листа“, вкупно десет. Осум од нив освои во првиот, додека две во вториот круг, јави МИА.
По Српска, следува Демократскот сојуз на Косово на Иса Мустафа со освоени осум градоначалнички места, по четри во двата круга.
Алијансата за иднината на Косово на актуелниот премиер Рамуш Харадинај победи во седум општини, две во првиот и пет во вториот круг, додека Демократската партија на претседателот на парламентот Кадри Весели, победа извојува во пет помали општини, една во првиот и четири во вториот круг.
Движењето „Самоопределување“ ќе раководи со три општини, вклучувајќи ја и Приштина, сите освоени во вториот круг.
Партијата на Беџет Пацоли, Алијанса за Ново Косово, и Иницијатива за Косово на Фатмир Лимај, како и партијата на турската етничка заедница, освоија по едно градоначалничко место, додека две општини ќе бидат раководени од независни кандидати.
На овие избори ниту една жена не успеа да добие доверба за да раководи некоја општина. Мимоза Кусари-Лила се надеваше на реизбор во Ѓаковица, која иако во првиот круг имаше предност не успеа да извојува победа.
Претседателката на Централната изборна комисија, Ваљдете Дака изјави дека изборниот ден
минал без поголеми проблеми. Од вкупно запишаните 1.353.680 граѓани, правото на глас го
оствариле 516.573 или 38,10%.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
