Изборите се ближат, а роковите газат. За измените во Изборниот законик меѓу другите, излезе крив и ДУИ. Вчера заклучивме дека сајбер нападите можат многу да влијаат во предизборниот период. Но, она што повеќе останува како предизборна проблематика е дали ќе има време за законот за Јавно обвинителство.
Точно, претседателот на Собранието најави дека нема никаква пречка да влезе во процедура на гласање Предлог законот за Јавно обвинителство, дури и ако се усогласи на 12 февруари до 23:00 часот.
Дека овој закон може да влијае не само на изборите, туку и на тоа како ќе се одвиваат пристапните преговори за членство на Северна Македонија во Европската унија, укажа и евроамбасадорот Самуел Жбогар. Доколку се усогласи законот, ќе се покаже потребната политичка волја, вели тој.
А дека политичка волја нема, се гледа од многу други конкретни примери. На пример, како што изјави пратеничката на СДСМ, Жаклина Лазаревска, ВМРО-ДПМНЕ го блокира и Предлог-законот за измена на Законот за исплата на платите. Или конкретно, одбивањето доаѓа од пратеникот Влатко Ѓорчев од ВМРО-ДПМНЕ, како претседател на Комисијата за труд и социјална политика кој никако не сака да закаже седница на која ќе се расправа за овој закон. Доколку Предлог-законот не биде изгласан до распуштањето на Собранието, поради блокадата од ВМРО-ДПМНЕ, вработените во високото образование со месеци нема да можат да го добијат покачувањето на платите што им следува.
Добар пример за немање политичка волја се и 56 ревизорски извештаи што упатуваат нап рекршување на законот или проневера на пари, а за кои надлежните институции немаат поведено постапка. Или ревизорските извештаи со години седат во фиоки, најмногу во Основнот јавно обвинителство. Зошто е тоа така, нема никаква информација. Останува само надешта на новиот Државен главен ревизор, Максим Ацевски, дека во наредниот период ќе добијат повратна информација за тоа што во суштина е направено со ревизорските извештаи во кои има индиции за сторено кривично или прекршочно дело.
Дури и за неопходното системско справување со корупцијата и воспоставување на вредносен демократски систем што произлезе како заклучок од денешната средба меѓу членовите на ДКСК и претседателот на државата Стево Пендаровски е потребна политичка волја.
Останува отворено прашањето како со опозиција што единствено изразува волја да ја сруши сегашната власт по секоја цена и да си ги одбрани сопствените криминали, може да се очекува градење на демократски систем, доволно силен да ги спроведе потребните реформи. Почнувајќи од долгорочните стратешки определби, завршувајќи со потребата од спроведуање на едни фини, слободни, фер и демократски избори.
Биљана Јордановска
