Една од заложбите на Европската комисија е и промовирање на различноста и вклученоста и борба против дискриминацијата на долгорочни основи, преку законодавството на земјите членки со цел да се постигне еднаквост во сите сфери на општеството и да им се овозможи на милиони луѓе да го достигнат својот целосен потенцијал. Сепак, сите ние – јавни институции, приватни компании, непрофитни организации, градови… сите треба да работиме заедно за да изградиме еднакви и инклузивни средини. Особено сега, за време на пандемијата КОВИД-19, кога различноста и вклученоста се изложени на ризик.
Според спроведените анкети, 59% Европејци веруваат дека дискриминацијата врз основа на етничкото потекло е широко распространета. Едно од три лица со африканско потекло вели дека доживеало расистичко малтретирање во последните пет години. Повеќе од 70 години по холокаустот, широко распространетиот антисемитизам влијае на еврејскиот народ во сите области на животот во ЕУ.
Од овие причини, Европскиот месец на различностите во 2021 година е со фокус на етничките различности и започнува со настан на високо ниво со европскиот комесар за еднаквост, Хелена Дали, на 4 мај 2021 година.
Од 2004 година, 26 повелби за различностите се воспоставени во Европа. Тие обезбедуваат поддршка и ги промовираат најдобрите практики во управувањето со различностите на илјадници водечки мултинационални компании, јавни организации и непрофитни организации. Европската платформа за повелби за различностите опфаќа 26 национални повелби кои ги претставуваат над 12,000 организации потписнички и повеќе од 16 милиони членови.
Платформата на ЕУ за повелби за различностите е создадена во 2010 година по иницијатива и со финансиска поддршка од Европската комисија. Платформата нуди место за постојните Европски повелби за различностите (во моментов 26) за размена и споделување на искуства и добри практики преку состаноци на Платформата, стручни семинари и годишни форуми на високо ниво.
Повелбите за различностите ги охрабруваат организациите (невладини организации, јавни тела, приватни компании) да развиваат и спроведуваат политики за различностите и инклузијата. Со потпишување на некоја од овие повелби, организацијата доброволно се обврзува да ги промовира различностите и еднаквите можности на работното место, без оглед на возраста, попреченоста, полот, расата или етничкото потекло, религијата или сексуалната ориентација.
Преку платформата, промоторите можат редовно да се среќаваат, да го споделуваат своето искуство и да развиваат заеднички алатки.
Германската повелбата на различностите, на пример, е промовирана од четири германски мултинационални компании во декември, 2006 година, со поддршка на Марија Бамер, тогашната комесарка на Федералната влада за миграции, бегалци и интеграција. Покровител на германската повелба е канцеларката Ангела Меркел. Досега ја потпишале над 2.900 компании од приватниот сектор, поголеми групации, невладини организации и фондации, како и дел од јавниот сектор.
„Ајде сите да заземеме посмела позиција кон различностите и да дејствуваме според тоа. Да ја покажеме нашата посветеност кон еднаквоста и овој мај, 2021 година, да го прославиме Европскиот месец на различностите заедно. Со различностите сплотени на работните места, ќе создадеме поправедна и порамноправна Европа за сите“ е пораката на актуелната еврокомесарка за еднаквост, Хелена Дали.
Во нашата земја, за одбележување е иницијативата на ЦИВИЛ која оваа година се спроведува со слоганот Направи разлика: Почитувај ги различностите посветена на промоцијата на различностите и европските вредности. И со овој проект, ЦИВИЛ, заедно со големиот број учеснички и учесници, ќе придонесе кон изградба на општество во кое различностите се почитуваат и доживуваат како предност, богатство и квалитет. Проектот е продолжение на иницијативата „Обединети во различноста“ која беше спроведена минатата година, но воедно е и дел од заложбите стари колку и самата организација (22 години).
Во инцијативата се вклучени јавни личности, уметници, активисти и интелектуалци кои говорат и пишиваат за богатството кое го носат различностите и европските вредности, како што се почитувањето на човековите права и слободи, слободата, еднаквоста и правдата.
подготви: Б. Јордановска