Во повеќе градови во Србија се во тек големи протести на просветните работници кои се поддржани од учениците и дел од родителите на учениците.
Се уште не се разјаснети повеќемесечните протести и незадоволството на просветните работници во Србија од платите и целокупната позиција, јавуваат српските медиуми.
Според училишниот календар, второто полугодие започна во понеделник на 20 јануари, откако заврши зимскиот распуст.
Учениците требало да се вратат во училниците по четири недели, бидејќи на годишен одмор заминале порано, на 24 декември. Иако репрезентативните синдикати за образование се договорија со Владата на Србија да го прекине штрајкот, противниците на договорот ја прекинаа работата и одржаа протестни собири.
Засега е невозможно да се утврди колку од околу 1.700 основни и средни училишта во Србија се отворени, колку од нив имаат скратена настава, а не се знае бројот на оние кои немаат настава на првиот ден по зимскиот распуст, а не се знае ни како ќе се одржува наставата од вторник.
Премиерот на Србија, Милош Вучевиќ, изјави дека во понеделник ( денеска) „повеќе од 80 отсто од училиштата ќе ја одржуваат наставата нормално“.
Тој најави дека владата во вторник ќе одржи седница и дека од вторник „просветниот инспекторат ќе оди во училиштата кои спротивно на законот ја прекинаа наставата“.
Дел од просветните работници рекоа дека прекинот на наставата е знак на поддршка за студентите кои со недели ги блокираат факултетите ширум земјата, барајќи од институциите да го почитуваат Уставот и законите и да ја вршат својата работа.
Ова пред се се однесува на утврдувањето на целосната одговорност за падот на настрешницата на железничката станица во Нови Сад на 1 ноември, кога загинаа 15 лица, а двајца беа тешко повредени, како и објавувањето на целата документација за тој проект.
Д. Т.
