Снимките од безбедносните камери на скопскиот локал во кој лице од обезбедувањето на претседателот на ВМРО-ДПМНЕ, Христијан Мицкоски, а кои ги објави „360 степени“, покажуваат што точно се случувало ноќта помеѓу саботата и неделата (17 и 18 февруари).
Имено, на снимката се гледа како две лица првично разговараат во внатрешноста на локалот. Според „360 степени“ станува збор за Ивица Б. – член на обезбедувањето на Мицкоски (облечен во црна блуза) и Влатко Г. – полицаец на должност (облечен во зимска јакна во окер боја).
По кратко време, разговорот преминува во туркање, па обиди на разделување од страна на други службени лица од полицијата, за на крајот ситуацијата кулминира и Ивица Б. го удира со тупаница Влатко Г. во главата, па по рацете.
Техничкиот министер за внатрешни работи Панче Тошковски, најави дека во текот на вчерашниот ден МВР ќе поднесе кривична пријава против Ивица Б. за напад на друго службено лице. Според министерот, тој ќе биде суспендиран од работа сè до донесување правосилна пресуда. Додека пак за информациите во јавноста дека Ивица Б. спречил акција на полицискиот тим од Единицата за недозволена трговија, посочи дека се невистинити, пишува 360 степени.
Од ВМРО-ДПМНЕ соопштија дека Ивица Б. ќе биде отстранет од обезбедувањето на лидерот Мицкоски, како и дека за нив нема селективност и законите важат за сите.
Од СДСМ, пак, бараат целосно расчистување на случајот и МВР да одговори на прашањето за улогата на Мицкоски, затоа што станува збор за спречување на акцијата против дрога од страна на негово обезбедување.
СДСМ потсетуваат на неодамнешни инциденти и на други членови на ВМРО-ДПМНЕ, како тој со претседателот на ОК-ДПМНЕ Пештани воедно и професор во музичко училиште кој беше фатен со кокаин, потоа наставничката во основно училиште во скопската населба Ново Лисиче, уапсена за дрога- претставник на ДПМНЕ во изборната комисија во Аеродром. И последниот случај на телохранителот на Мицкоски кој физички нападна полицаец за да спречи акција за откривање на дрога во познат скопски локал. Од партијата прашуваат : Дали структурите на ДПМНЕ во ВМРО-МВРО, сега откако имаат министер, ја попречуваат борбата против дилерите со дрога?“
