Спроведување на приоритетни, но и сет други мерки, коишто ќе придонесат за итна деконтаминација на Битола, и ќе го спречат загадувањето што РЕК и домаќинствата особено го предизвикуваат во зимскиот период. Ова го побара битолското граѓанско здружение „За нас се работи“, кое што на свое барање оствари работна средба со премиерот Зоран Заев, заменик министерот за животна средина, Јани Макрадуи, директорот на електраната РЕК – Битола, Драга Миноски и други владини експерти за животна средина.
„Ги презентиравме преку фотографии сите извори на загадување на Битола и околината. И премиерот и другите владини претставници констатираа дека состојбата е таква, каква што ја предочивме. Дадовме многу предлози, коишто ги собиравме во овие последни две до три години, сите ги прифатија, а за некои имаа и свои дополнувања. Констатирвме дека некои процеси се подолгорочни, како што е спроведувањето на топлификација, па дојдовме до заеднички заклучок дека во меѓувреме треба да се работи и на изнаоѓање други решенија. Според нив, гасификцијата ќе биде една од подолгорочните мерки, се мисли на изградбата на кракот од Неготино, но пред тоа постои шанса, природен гас да се носи до РЕК-Битола, на некој друг начин. За нас е битно да се преземат најитните мерки, а РЕК – Битола може со многу малку средства да го реши отпепелувањето. За ефектите што ќе се постигнат не треба да се говори“, изјави Душко Груевски, за ЦИВИЛ Медиа, потенцијарајќи и дека особено треба да се работи на изнаоѓање на решенија со домаќинствата, кои што во зимскиот период енормно го загадуваат и така контаминираниот воздух во Битола.
Инаку, здружението „За нас се работи“, со своја независна советничка листи ќе ја води изборната битка на локалните избори. А, преку избраните советници во битолскиот Совет,и натаму ќе продолжи да функционира како паралелен Совет, што ќе биде директна помош на нивниот претставник, со цел, да се подобрува квалитетот на животот во градот на конзулите.
Моника Талеска