Пишува: Амб. ЛАРИСА ДИР
Вонредна и Ополномоштена Амбасадорка на Украина во Република Северна Македонија
Еден од клучните елементи за стабилен мир е враќањето на украинските деца, кои насилно беа депортирани во Русија.
кремљскиот режим продолжува со злосторничката пракса на принудно преселување и депортација на украински деца и на секој можен начин го попречува нивното враќање и повторното обединување со нивните семејства во Украина.
Како што е познато, на 17 март 2023 година, Меѓународниот кривичен суд издаде налози за апсење на претседателот на Русија, В. Путин, и на руската омбудсманка, М. Љвова-Белова, заради незаконска депортација и присилно преселување на украински деца. Ова е меѓународно признание за злосторствата извршени од Русија, кои не смеат да останат неказнети.
Враќањето на украинските деца не е само хуманитарно прашање, туку и прашање на безбедност и правда за Украина. Без враќањето на украдените деца, не може да има праведен мир.
Иницијативата Bring Kids Back UA – пат кон враќање на украдените украински деца.
Bring Kids Back UA е национална иницијатива, покрената од Претседателот на Украина, Володимир Зеленски, која ги обединува напорите на владите, меѓународните организации и граѓанското општество за враќање на децата кои беа киднапирани од Русија.
Заклучно со 25 февруари 2025 година, во Меѓународната коалиција за враќање на депортираните деца членуваат 41 земја:
Албанија, Аргентина, Австралија, Австрија, Белгија, Бугарија, Канада (копретседавач), Чиле, Костарика, Советот на Европа, Чешка, Хрватска, Данска, Естонија, Финска, Франција, Грузија, Германија, Грција, Исланд, Ирска, Италија, Јапонија, Латвија, Лихтенштајн, Литванија, Луксембург, Малта, Молдавија, Црна Гора, Холандија, Северна Македонија, Норвешка, Полска, Португалија, Романија, Словенија, Шпанија, Шведска, Украина (копретседавач), Обединетото Кралство и Соединетите Американски Држави.
Bring Kids Back UA е фокусирана на следниве клучни области:
- Барање на исчезнатите деца – идентификација и документирање на случаите на депортација на украински деца, особено на териториите под привремена окупација.
- Водење регистар на депортираните деца – Украина развива систем за собирање и проверка на податоци за киднапираните деца, кој ќе биде интегриран со базите на податоци на други држави и меѓународни организации.
- Враќање на децата во Украина – процесот на враќање на децата се одвива преку посредство на трети земји и соработка со меѓународни организации. Како посредници во преговорите за враќање на децата учествуваат земји како Катар, Ватикан и Саудиска Арабија.
Заклучно со 7 март 2025 година, успешно се вратени 236 деца, кои беа депортирани или изложени на ризик од присилно преселување. - Реинтеграција и рехабилитација на децата – ниту едно вратено дете не се сместува во институционални домови – тие веднаш се обединуваат со своите семејства или се згрижуваат во хранителски семејства.
Украина обезбедува долгорочна поддршка за децата, вклучувајќи пристап до образование, психолошка помош и социјална адаптација. - Правда – злосторствата на Русија врз украинските деца се документираат и се предаваат на Меѓународниот кривичен суд за да се обезбеди казнување на одговорните.
Светот мора да се сеќава на воените злосторства на Русија и да ја поддржи кампањата за враќање на украдените украински деца.
Враќањето на секое дете е чекор кон правда, безбедност и победа на Украина.
