Додека владејачката ВМРО – ДПМНЕ упорно го посочува на судијата Пајазит Пајазити како единствен виновник за бегството на Блерим Рамадани, од најголемата опозициска партија СДСМ тврдат дека бегството на Блерим Рамадани е организирано од структури на МВР и вработени во институциите.
Во соопштението до јавноста од ВМРО-ДПМНЕ се вели дека Пајазит Пајазити ја оцрни судската фела во целост, молкот на Судскиот совет е само доказ зошто треба да биде реформиран.
Од владејачката партија понатаму велат дека ако институциите во правосудството на целата очигледна незаконитост не го разрешат Пајазити, тогаш сами потврдуваат дека се испостава на ДУИ и Филипче.
Според нив, Пајазити не само што го овозможи бегството на Блерим Рамадани, туку и условно го осуди Иџет Мемети, кој призна дека земал поткуп, дело за кое е предвиден затвор, истовремено, Пајазити е судијата кој не определи притвор ниту за бандитите кои упаднаа на скопскиот аеродром.
Институциите во правосудството со молкот кој го покажуваат кон Пајазити само покажуваат зошто треба да бидат реформирани. Потребна е одговорност, сметаат од ВМРО – ДПМНЕ.
Истовремено, на прес конференција на СДСМ, пратеникот Митко Трајчулески истакна дека е време јавноста конечно да ја дознае вистината за скандалот поврзан со бегството на Блерим Рамадани која се крие од страна на МВР по секоја цена, вистина која ја разоткрива целосната шема за тоа кој го организирал и овозможил бегството на Рамадани и како всушност е партизирана и узурпирана државната граница со Косово од страна на структури од власта.
Денес ќе поставиме прашања, и доколку Владата и МВР не се одважат да излезат и јавно да ја соопштат вистината за целата организација на бегството на Рамадани,, СДСМ ќе го објави целиот скандал, изјави пратеникот Трајчулески и додаде дека по сите информации кои ги имаат јасно е дека Владата и МВР точно знаат што се случило и молчат.
Трајчулески постави прашање до Тошковски, ВМРО-ДПМНЕ и ВЛЕН, давајќи им можност сами да излезат во јавноста со фактите, а потоа да започне процес на истрага и оставки од сите вклучени во скандалот со бегството на Блерим Рамадани.
Прво, дали е точно, дека на 10.8., кога Рамадани бил во куќен притвор, тој всушност си бил на Косово? Дали е точно дека на тој ден околу 18 часот и 40 минути, Рамадани со возило, без да биде застанато на границата, бил однесен на Косово и доцна вечерта вратен во куќниот притвор во Македонија? прашува Трајчулески и потсетува дека ги имаат деталите и секоја лага на Владата и институциите во однос на ова е кривично дело,
Понатаму, Трајчулески прашува дали е точно дека на 14.8 односно дента кога е избеган Рамадани, тој ја напуштил државата на ист начин со службено возило на државна институција, управувано од човек вработен во институциите, а повторно пропуштен на граничниот премин без никаква контрола?
Дали ова не значи дека не станува збор за бегствто, туку организирано пуштање на затвореникот во Косово во кое учествувале македонските институции? Дали ова не е всушност партиско полициска организирана шема?
Од СДСМ го прашуваат Тошковски, дали е можно човек баран со меѓународна потерница буквално да се шетал преку границата два пати додека де факто е во притвор кој треба да го обезбедува МВР?
Која е улогата на МВР во овозможување на прошетките на Рамадани и негово конечно напуштање непречено на државата?
На прес конференцијата Трајчулески истакна дека очекуваат одговори во следните 24 часа, доколку не ги добијат, ќе ги објават сите информации од свиркачите кои ги добиле.
М. Д,
