„Не сум за предвремени избори, сметам дека тоа е неосновано трошење на буџетот на граѓаните. Но, ја туркаме идејата за реформи во Изборниот модел, бидејќи гледаме дека вака поставениот изборен модел, не дава некаков избор на граѓаните“, изјави Моника Зајкова, претседателка на ЛДП и пратеничка, во интервјуто за ТВ Тера.
Зајкова додаде дека анкетите покажуваат дека голем процент од граѓаните не излегуваат на избори бидејќи нивниот глас оди во ветер.
„Доколку заокружиле за некој партија која што не освоила доволно во една изборна единица, меѓутоа на ниво на цела држава освоила значителен број на гласови, сепак останува без свој претставник во Парламентот“, вели Зајкова.
Таа додава дека барањето за една изборна единица е дел од програмските договори кои што ЛДП ги водела, а каде СДСМ изразила декларативна поддршка, но процесите не се одвиваат.
„Формирана е една работна група во Министерството за правда, меѓутоа таа работи исклучиво по забелешките на ОБСЕ/ОДИХР кои што не ја опфаќаат промената на изборниот модел. Ние како предлагачи, остануваме на ставот за една изборна единица. Комисијата донесе заклучок на комисиската расправа дека треба да се води јавна дискусија, што по мене е апсурдно, бидејќи во минатиот парламентарен состав исто така се водеше јавна дискусија“, вели Зајкова.
Таа смета дека големите политички партии од македонскиот и албанскиот блог си ја префрлаат топката. Според неа, на пример, ВМРО-ДПМНЕ имаше 11 години да направи измени, што не ги направи, па бараа 120 изборни единици, а сега се поддржувачи на една изборна единица. Од ДУИ, пак, вели Зајкова, во минатиот состав со амандмани се блокираше процесот, а сега бараат нереални прагови од 5%.
„ЛДП е на ставот дека ако нема расположение за промена на изборниот модел, е спремна да преговара за промена на математичката формула по која што се пресметуваат гласовите, што, исто така, може да биде некаков напредок во делот на еднаква репрезентативност на гласот“, додава Зајкова.