Министерката за труд и социјална политика Јагода Шахпаска вчера изјави дека Законот за спречување и заштита од дискриминација во дискриминаторските основи ги вклучува и сексуалната ориентација и родовиот идентитет, и дека за нив сите граѓани се исти и секој има право да се определи како се чувствува и треба да биде почитуван затоа што е различен.
Шахпаска ја потенцираше важноста од носењето на Законот за спречување и заштита од дискриминација кој претставува законско решение за кого гласаа заедно и власта и опозицијата, што е вистински сигнал дека нашето општество се движи во вистинска насока.
Таа воедно зборуваше и за активностите и политиките кои во моментот се реализираат, како што е Акцискиот план за унапредување на правата на ЛГБТИ+ заедницата, а она на кое треба да се работи периодот кој доаѓа е Евалуација на стратегијата за еднаквост и недискриминација која што ќе претставува темел за создавање на нова стратегија. Воспоставувањето на СОС линијата за ЛГБТ заедницата и првиот шелтер центар за лицата од ЛГБТИ+ заедницата се дел од проектите кои се реализирани.
Министерката го истакна значењето на секој од нас од својата позиција, а особено вршителите на јавни функции, граѓанскиот сектор, да придонесат во овозможувањето на уживање на сите права на еднакви основи за сите граѓани, како правото на образование, здравствена заштита, правата на учество во јавниот и политичкиот живот. Таа додаде дека без разлика дали се работи за лица од ЛГБТ заедницата, лицата со попреченост, политичари или работници, дискриминација не смее да постои.
Шахпаска го потенцираше успехот на нашата земја на картата на Rainbow за 2020 година карта која ги рангира земјите во однос на напредокот во почитувањето на лицата на ЛГБТИ+ заедницата, каде сме рангирани на 33 позицијата односно бележиме скок за 12 позиции во однос на минатата година.
„Тоа значи дека нашата земја сериозно чекори во имплементацијата на човековите права како еден од условите да станеме рамноправен член на големото европско семејство“, заклучи Шахпаска.
Законот за спречување и заштита од дискриминација беше донесен во октомври годинава, со 70 гласа „за“ во Собранието.
Законот обезбедува принцип на еднаквост во заштитата од дискриминација и во остварување на човековите права и слободи. Преку овој Закон земјата се доближува до меѓународните стандарди усвоени од ООН и Европската Унија, а граѓаните добиваат соодветна правна заштита и општество кое ги негува различностите и овозможува еднакви услови за развој за сите.
Измените меѓу другото, предвидуваат членовите на Комисијата за спречување и заштита од дискриминација да ги предлага посебна Комисија за селекција, составена од седум члена – по два пратеника од власт и од опозиција и тројца претставници од граѓанското општество, наместо тие да бидат на предлог на собраниската Комисија за избори и именувања.
Законот за спречување и заштита од дискриминација. еднаш веќе ги помина сите филтри – и во владина и во собраниска процедура и е целосно усогласен и работен во соработка со невладиниот сектор, но поради одредени претходни пропусти, Уставниот суд на 14 мај оваа година го укина. Со неговото донесување во речиси идентична форма, како онаа што беше изгласана во Собранието, се надминува празнината во немањето заштита од дискриминација по кој било основ што настана по неговото укинување, а која беше нотирана и во Извештајот на ЕК за 2020 година за напредокот на земјата.
Премиерот Заев тогаш изјави дека припадниците на маргинализираните заедници, вклучувајќи ја и ЛГБТИ+ заедницата се еднакви пред законот како и сите останати граѓани.
„Со стапувањето на сила, секој граѓанин ќе знае дека е безбеден во својата држава и дека ќе може да ги обезбеди своите права, загарантирани со уставот. Честитки за сите активни граѓани кои доследно се изборија за овој успех“, додаде Заев.
А. П.
