Како веќе стандардна процедура, кога иборните процеси се во прашање, во ЦИВИЛ – Центар за слобода, секојдневно пристигнуваат пријави од граѓанки и граѓани за неправилности во Избирачкиот список.
И покрај препораките за измени во Изборниот законик во одредени членови што се спорни, посебно во делот евиденција на избирачкото право, Државната изборна комисија оцени дека според должностите од План 3-6-9 и со закажаните локални избори за 15 октомври, нема време за одлуки за измени во Изборниот законик.
Собранието донесе одлука со самото распишување на локалните избори дека нема никакви пречки, што значи граѓанките и граѓаните можат да очекуваат демократска и фер борба на локално ниво.
Сепак, можностите за манипулации со Избирачкиот список остануваат, а може да се очекува и хаварија со Избирачкиот список. Прашањето што го поставивме е дали овој последен став е основа и за неможноста да се прочисти Избирачкиот список од фантомските гласачи, токму во спорната реченица во членот 41 став 5.
„Со оглед дека македонското законодавство нема посебен Закон за попис на гласачите, ниту пак Закон за регистар на гласачите (како што има, на пример, хрватското законодавство), законската одредба во смисла на член 41 став 5 од актуелниот Изборен законик, го спречува чистењето на Избирачкиот список од т.н. фантомски гласачи“, изјави Сандра Гавриловска, адвокатка и членка на Експертскиот борд на ЦИВИЛ.
„Сметам дека лицата, државјани на РМ, кои се на привремена работа или престој во странство, треба да бидат евидентирани во посебен избирачки список односно регистар на гласачи надвор од местото на живеење односно престојување (пријавено пред нивното заминување во странство). На тој начин, Избирачкиот список ќе ги отсликува реалните гласачи и ќе оневозможува манипулација со гласачите надвор од пријавеното место на живеење и/или престојување (фантомските гласачи)“, објасни Гавриловска.
