Проектот „Од акција до еднакви права за Ромите”, беше презентиран денеска на тркалезна маса во Скопје. Во делот на препораките од проектот наведено е воведувањето на сегрегацијата како посебен вид дискриминација, говорот на омраза да се третира како кривично дело, подобрување на пристапот до правда, подигнување на свесноста за дискриминација, забрзување на процесот на легализација на ромските населби и помош за остварување на право на домување и помош на лицата од Ромската етничка заедница без документи, за добивање на истите.
Мила Царовска, министерката за труд и социјална политика, истакна дека се реализираат мерки со кои се унапредуваат правата и состојбата на Ромите во Македонија. Преземени се чекори за решавање на проблемот со немањето лични документи, инклузија на децата Роми во претшколските установи преку ослободување од плаќање за семејства во ризик, и привремено е решен проблемот со Ромите кои живееа под скопско Кале.
Министерката посочи дека лицата што живееја под Калето, се сместени во социјални објекти, децата се вклучени во дневни центри, и додаде дека се уредуваат мини куќички во Визбегово каде што ќе бидат сместени. Исто така, додаде и дека е направен список на социјални станови и дека ќе биде објавен оглас за прераспределба.
Извршниот директор на Асоцијацијата за демократски развој на Ромите – „Сонце“, Ферди Исмаили, кој работеше на проектот, посочи дека за подобро остварување на правата на Ромите, потребно е во националните мрежи да бидат вклучени и други организации, а не само ромски, со цел и тие да дадат придонес за справување со отворените прашања.
Проектот е финансиски поддржан од Европската унија.
А.П.