„Го поздравуваме апелот на Европската Унија до нашиот регион да покажеме дека членството во унијата е генерациски избор и стратегиска ориентација. Истовремено очекуваме ист однос и од земјите членки на Европската Унија кон нас“, рече премиерот Зоран Заев на прес-конференција во Софија, по средбата со својот грчки колега Алексис Ципрас.
„На домашен план, заробената држава и 25 годишниот спор околу името беа најтешките тегоби коишто во целиот овој период ја влечеа Македонија надолу. Денес се соочуваме со нив и успеваме. Денес Македонија и граѓаните одат напред. Заедно зацртавме дека 2018 ќе биде година на силни реформи и дека Македонија ја носиме во Европската Унија, а со тоа Европа ја носиме во Македонија“, истакна Заев.
Тој рече дека Македонија и Грција имаат опција која и за двете страни може да биде прифатлива и оцени дека денеска со Ципрас имале суштествена средба на која го потврдиле тоа што претходно го договориле шефовите на дипломатиите на двете земји.
„Важно беше да ги потврдиме сите успеси, разговаравме суштествено и разгледавме неколку опции“, рече Заев.
Една од опциите е решение прифатливо за двете страни.
„По сето тоа што досега беше постигнато како премиери констатиравме и потврдиме дека стоиме зад сето тоа. И добро е што е завршено. Тоа што беше останато опциски го отворивме, преку неколку опции, и утврдивме една опција која може да биде прифатлива за двете страни“, рече Заев на прес конференцијата.
Притоа тој додаде дека двете страни мора да внимаваат како тоа што е договорено, потоа инститиуционално ќе се спроведе.
„Мора да разговараме со претседателите на двете држави, со другите лидери, со шефовите на опозицајата, така што остануваме да ги разработиме и другите детали“, рече премиерот .
На прашање дали може да дојде до одложување на решението за името, Заев кусо возврати- „Не дај боже“, но веднаш и додаде дека е меѓу двете страни е развиено неповратно пријателство, кое и во иднина ќе се развива.
-Би било убаво решението што двете страни би сакале да биде прифатливо, да се постигне уште сега, бидејќи на крајот на јуни имаме европски Совет, а тоа би било дополнително охрабрување за европскиот Совет.
Доколку не е возможно, кажа премиерот, ние продолжуваме во барањето решение, се додека не се договориме.
К. С.
