До крајот на јануари ќе се формира Совет за следење на имплементацијата на Стратегијата во правосудството за периодот од 2017 до 2022 година, најави премиерот Зоран Заев на денешната владина седница.
Со ова тело, како што соопшти попладнево владината прес-служба, ќе претседава премиерот Заев.
– Воедно, премиерот Заев, на 48. седница јавно им се заблагодари за завршената успешна работа на членовите на Советот за реформи во правосудството кој работи во рамки на Министерството за правда и кои активно работеа на изработка на Стратегијата како обврска предвидена во деловите 3 и 6 од планот 3-6-9, соопшти Владата.
На предлог на Министерството за надворешни работи е усвоен Предлог-законот за ратификација на дополнителниот протокол 5 на Договорот за изменување и пристапување на Централно-европскиот договор за слободна трговија. На седницата е посочено дека ова претставува обврска која произлегува од Самитот на Западен Балкан што се одржа во Трст, а чија имплементација позитивно ќе влијае на трговската размена на Македонија со земјите од регионот, од ЦЕФТА и од ЕУ.
Усвоена е и Информацијата за реализација на препораките на ГРЕКО (Група на држави против корупција) на Советот на Европа дадени со Извештајот за евалуација на Република Македонија на тема „Превенција на корупцијата кај членовите на Собранието, судиите и обвинителите“. Задолжено е Министерството за правда да го достави до ГРЕКО вториот ситуациски извештај со кој ќе информира за целокупниот прогрес во реализација на препораките.
Министрите ја разгледаа и информацијата за зголемување на придонесот на Македонија во мисијата на НАТО во Авганистан „Одлучна поддршка 2018“ при што е оценето дека е постигнат значаен придонес во интензивирањето на активностите поврзани со напорите за полноправно членство на земјата во НАТО.
Владата ја усвои и информацијата за потребата на прием во редовен работен однос на пилоти во Дирекцијата за заштита и спасување и задолжени се министерствата за одбрана, за внатрешни работи, за финансии и Дирекцијата за заштита и спасување да се изнајде навремено решение за ангажирање на пилоти во ДЗС.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
Одговорноста за редакциското опремување на текстовите (наслов, наднаслов, фотографија, тагови) е на ЦИВИЛ Медиа.