Здружението на Украинците во Северна Македонија, „Лесја Украинка“, преку соопштение до медиумите реагира на сè почестите дезинформации во врска со руската инвазијата врз Украина, како и одобрувањето на воените злосторства, односно на навредите и говорот на омраза на интернет. Здружението побара мерки за сузбивање на овие негативни појави, кои се оквалификувани како кривични дела во македонското законодавство.
Во информациониот простор нагло се зголеми бројот на дезинформациски пројави во вид на груби, навредливи, понижувачки и провокативни коментари под интернет-публикациите, кои јавно ги негираат злосторствата против Украина, ги одобруваат или оправдуваат истите или шират невистинити информации во врска со случувањата во Украина, порачува Здружението на Украинците во Северна Македонија „Лесја Украинка“.
Со оглед на постоење соодветни закони (на пример, одобрување или оправдување на геноцид, злосторства против човечноста или воени злосторства е кривично дело предвидено во членот 407-а од Кривичниот законик на РСМ), како и постоење соодветни групи во Европската Унија, како на пример, ESTF East StratCom Task Force, насочени на спречување руски дезинформации, и земајќи предвид дека Владата на РСМ најави активна соработка со стратешките сојузи ЕУ и НАТО, и реши да се спротивставува на лажните вести и дезинформациите, заштитувајќи ги граѓаните од штетите кои ги предизвикуваат овие појави, сметаме дека е потребно воведување на мерки насочени на сузбивање на бранот на лажните информации и говорот на омраза во врска со воената агресија на Русија врз Украина, посочуваат од „Лесја Украинка“.
Од здружението потенцираат дека, иако, Јавното обвинителство и Министерството за внатрешни работи најавија дека ќе преземат кривичен прогон против сите сторители кои со своите несени ставови ќе го сторат наведеното кривично дело, се појавија и ставовите на македонските правници за невозможност да се примени горепосочениот закон се додека нема правосилно решение од Меѓународниот суд за признавање на дело за воено злосторство или геноцид. Поради тоа како и поради отсуство на кибер полиција во земјава, бараме начин да се справиме со енормниот број коментари кои служат за покренување на говор на омраза и поттикнување и оправдување насилство врз Украина во македонската јавност.
Нас ни е позната праксата на многу европски земји во врска со спречување на говорот на омраза, и како една од мерките на тоа – исклучување на коментари под публикации на медиумите, и со тоа намалување на ширење на бот пропагандата,
Од „Лесја Украинка“ сметаат дека руската пропаганда и разгорувањето проруско расположение, воедно како и впечаток за постоење на големи слоеви на население кои се подлегнати на таквата пропаганда, покрај друго, й нанесуваат огромна штета на Република Северна Македонија, и се насочени на дестабилизација на земјата и Балканот, на уривање на угледот на државните институции и медиумите.
Со оглед на гореизнесеното, со цел да се намали штетното влијание на руската пропаганда преку вештачки создадени страни и профили, како и искривување на реалната слика на објавени публикации и видео информации преку коментарите во вашите ценети медиуми, ве молиме за отстранување на изворите за истите, односно во најкраток можен рок да укинете можност за пишување коментари под чувствителни публикации на интернет страните и социјалните мрежи, посветени на руската инвазија на Украина и сите настани поврзани со истата.