ЦИВИЛ – Центар за слобода, денеска во хотелот „Сити Парк“ ги додели последните пет награди за најуспешните и највлијателните стории на граѓански новинарки и новинари од втората фаза на долгорочниот проект „Граѓански објектив“.
Комисијата на ЦИВИЛ – Центар за слобода на 27 септември 2017 година, ги разгледа и оцени пристигнатите материјали за натпреварот „Биди граѓански новинар” и ги награди петте најуспешни, највидливи и највлијателни стории.
Една од двете четврти награди е доделена на Дејан Ристов од Велес за прилогот „Опозицијата проѕирно се обидува да ја дефокусира јавноста“.
Втората четврта награда замина во рацете на анонимната граѓанска новинарка која ја извести јавноста за состојбата на училиштето во село Дрвош – „При реновирано училиште, учениците користат полски тоалет“.
Третата награда, исто така, е доделена на анонимен граѓански новинар од Велес за прилогот „Партиски потпис за 150 денари!“.
По овој прилог редакцијата на ЦИВИЛ Медиа, во духот на кооперативното новинарство ја следеше приказната и откри дека поткупот го вршел токму претседателот на споменатата партија. Сторијата е објавена на ЦИВИЛ Медиа.
Втората награда ја доби граѓанскиот новинар Амед Буцолај за прилогот „МВР со засилени контроли ги штити младите од насилници“. По овој прилог, контролите на автобуските станици во Скопје, каде често има инциденти меѓу групи ученици се засилени.
Првата награда за најуспешен прилог за август и септември е прилогот на Александар Младеновиќ „Еве ти, шарена револуција!“.
Со ова доделување на награди завршува втората фаза на проектот „Граѓански објектив“.
Од први октомври, ЦИВИЛ започнува со третата фаза од проектот, којшто овој пат ќе биде надграден и модернизиран.
ЦИВИЛ ги повикува граѓанските новинарки и новинари да бидат будни и „на готовс“ со своите умни телефони и секако со своите умни глави.
Маја Ивановска
Фото: Биљана Јордановска
