Здружението на новинарите на Македонија (ЗНМ) се заблагодарува за објективниот годишен извештај на американскиот Стејт Департмент, за „слободата на говорот во Македонија, во кој се констатира дека слободите се загрозени поради постојаниот притисок на владата врз медиумите“.
Според ЗНМ, Вашингтон ги препознава изворите на кризата во македонските медиуми како што е појавата на неказнивост на насилството врз новинарите и злоупотребата на јавни пари од Владата за контрола на медиумите.
Во соопштението на ЗНМ, се вели дека во извештајот, „Американците зборуваат за зачестените инциденти – од физички напади до смртни закани против новинарите, во кои се вклучени и носители на јавни функции. Загрижува фактот што ниту еден од овие напади не е расветлен досега од институциите“.
Според репрезентативната новинарска асоцијација „посебно внимание во Извештајот се посветува на злоупотребата на јавните пари од Владата, со цел да се замолчат и инструментализираат медиумите. И покрај мораториумот на Владините кампањи во 2015 година, во Извештајот се наведува дека таа мерка не ги опфатила сите јавни и приватни институции поврзани со ВМРО-ДПМНЕ“.
ЗНМ смета Извештајот е потврда и за релевантноста на нивните ставови кои постојано ги застапуваат во јавноста, кои според асоцијацијата, се широко користени како аргументи во описот на состојбата во медиумите.
„За Македонската Радио Телевизија, се потенцира дека се злоупотребува за промоција на владејачката партија, како дел од координираната уредувачка политика, со уште три најгледани приватни телевизии“, се вели во соопштението на ЗНМ..
„Важно место во Извештајот има и системската хајка против новинари од власта, преку тужби за клевета и лустрација. Овој вид на притисок се илустрира со случајот со лустрирањето на главниот уредник на ‘Фокус’, Јадранка Костова и тужбата за клевета од ДУИ против главниот уредник на весникот ‘Лајм’, Исен Салиу“, пишува во соопштението на ЗНМ.