„Специјалното јавно обвинителство делумно се откажа од обвинението против новинарот Зоран Божиновски, кој наместо за три кривични дела по шест точки ќе биде обвинет за три кривични дела по пет точки“, соопштуваат од Здружението на новинари.
Од таму додаваат дека СЈО, кое за случајот „Шпион“ ја презема надлежноста во март годинава, се откажа од точката 27, поради тоа што во обвинителниот акт, Основното јавно обвинителство за гонење организиран криминал и корупција, кое досега постапувало за случајот, нема наведено правна квалификација за кривичното дело.
„Во одговорот на СЈО на прашањата на ЗНМ во врска со случајот на Божиновски, се вели дека точката се однесува на дејствие на друго лице за кое тоа лице веќе е осудено. За тоа веќе бил известен судот, кој се очекува да донесе решение за запирање на постапката по таа точка“, истакнуваат од ЗНМ.
Од ЗНМ прашуваат оти Основното јавно обвинителство за гонење организиран криминал и корупција никогаш не дало објаснување зошто до март годинава одбило да ја признае надлежноста на СЈО над случајот „Шпион“.
Д.М.
