Здружението на новинари на Македонија ја повика Владата итно, во најбрз можен рок, да обезбеди средства за подмирување на долгот од околу половина милион евра што МРТ го има кон Европската радиодифузна унија (ЕБУ).
„На овој начин ќе се отстрани опасноста Македонската радио и телевизија да биде „отсечена“ од Европското радиодифузно семејство што претставува голем чекор назад во процесот на европските интеграции со кој дополнително се нарушува имиџот на Република Македонија“, се вели во соопштението на ЗНМ.
Неподмирувањето на долгот значи дека МРТ нема да може да емитува програма од ниту една членка на ЕБУ, ниту спортски натпревари, филмови, странски емисии, цртани филмови и документарна програма.
Од ЗНМ соопштуваат дека во моментов, според информациите од централата на ЕБУ, МРТ нема пристап до содржините што се емитуваат преку нивните сервиси.
Реакцијата на ЕБУ според ЗНМ е последица на повеќегодишно недомаќинско работење на јавниот сервис за што треба да се преземе одговорност. Исклучувањето на МРТ од ЕБУ е резултат на нефункционалниот модел на финансирање на јавниот сервис и на лошиот менаџмент.
Програмскиот совет на МРТ на вчерашната седница донесе заклучок со кој побара од Владата да го подмири долгот на МРТ кон Европската радиодифузна унија.