Откако до Дирекцијата за заштита на личните податоци (ДЗЛП), биле испратени неколку иницијативи за вршење на инспекциски надзор врз медиуми, односно информативни интернет-портали, со цел утврдување на прекршувања на Законот за заштита на личните податоци, Дирекцијата преку соопштение побара од медиумите да се придржуваат до начелата предвидени во Законот.
„Им укажуваме на сите онлајн-портали и печатени медиуми дека е потребно да иницираат бришење на личните податоци, односно, минимизирање на обемот на личните податоци што се објавуваат во согласност со целта која треба да се исполни при објавата, заради правично, соодветно, релевантно и не преобемно утврдување на категориите на лични податоци (презиме, име, адреса на живеење – населено место и улица, податок за своерачно потпишување) на граѓаните (субјекти на лични податоци)“, се вели во соопштението.
ДЗЛП укажува на на член 8 од Законот за заштита на личните податоци: „Забранета е обработка на посебните категории на лични податоци“.
Обработката на лични податоци може да се врши само во исклучителни ситуации. Конкретно, правилата за обработка на матичниот број како личен податок, се опфатени со член 9 од истиот закон.
Од ДЗЛП, објаснуваат дека матичниот број на граѓанинот може да се обработува само по претходна изречна согласност на субјектот на лични податоци, за остварување на со закон утврдени права или обврски на субјектот на лични податоци или контролорот, и во други случаи утврдени со закон.
Во изминатиот период, дел од порталите во Македонија, со објавување на лични податоци, неретко ги прекршуваат овие два члена.
Еден од тие случаи е и објавувањето на личната карта на претседателот на ЦИВИЛ-Центар за слобода, Џабир Дерала, на порталот „Дудинка“. По поднесување на Барање за утврдување на правото на заштита на лични податоци, ДЗЛП, утврди повреда на тоа право и беше забранета натамошна обработка на личните податоци на Дерала.
М. Теговска
