ВЕСТ НА ДЕНОТ
Албанија ги отвори преговорите по кластерот „Надворешни односи“
Европската Унија и Албанија денеска во Брисел ја одржаа третата Меѓувладина пристапна конференција на која официјално беа отворени преговорите по Кластерот 6 – „Надворешни односи“.
Во рамките на овој Кластер се поглавјата 30 – „Надворешни односи“ и 31 – „Надворешна, безбедносна и одбранбена политика“. Ова е втор кластер од преговарачкиот процес што го отвора Албанија по кластерот 1 – „Основни вредности“, по кој преговорите започнаа на 15 октомври годинава.
ИЗЈАВА НА ДЕНОТ
Обединетото Кралство нема да жали за рускиот генерал Кирилов
Обединетото Кралство нема да жали за Игор Кирилов, рускиот генерал кој загина во експлозија во Москва во вторникот, соопшти Даунинг стрит.
„Јасно е дека нема да жалиме за смртта на лице што промовираше незаконска инвазија и наметна страдање и смрт врз украинскиот народ,“ изјави официјалниот портпарол на британскиот премиер Кир Стармер во вторникот.
РЕГИОН
ЕУ со писмо до Србија за кластерот 3
Советот за општи работи на Европската унија го одобри писмото со кое ја поканува Србија да ја достави својата преговарачка позиција за отворање на кластерот 3 во пристапните преговори, објави во вторникот унгарското претседателство.
Одлуката е донесена на состанокот на министрите одговорни за европски прашања. Писмото упатено до Србија се однесува на поглавје 16 (оданочување) и поглавје 19 (социјални политики и вработување), во рамките на кластерот 3: Конкурентност и инклузивен раст.
СВЕТ
Убиен рускиот генерал Игор Кирилов, началник на силите за нуклеарна, биолошка и хемиска одбрана
Високо рангиран генерал на руската армија и неговиот асистент загинаа во експлозија во Москва, објави Би-Би-Си утрово, пренесе ЦивилМедиа.
Генерал-полковник Игор Кирилов, началник на силите за нуклеарна, биолошка и хемиска одбрана (НБХ), ја напуштал станбената зграда рано во вторникот кога уред скриен во тротинет експлодирал, соопштија руските власти.
ИНТЕРВЈУ
Проф. Витис Јурконис: Литванците знаат дека борбата на Украина е за сите нас – ако Украина падне, Русија ќе нападне други земји
СЛОБОДНА ЗОНА
„Лидерите на актуелниве од власта денеска нè просветлија со ниви бисери, едниот, премиерот, ќе одел во Брисел и, како што ни порача, ќе одел пак да ни го брани идентитетот, да ни ја враќал гордоста или, парафразирано така некако, другиот пак, оној до него, шефот на новите патриоти, оние од ЗНАМ де, објавија некаков текст, нешто како нон пејпер, исто така нешто за гордост и за патриотизам, некаква демек платформа за македонско национално единство…“, По допрен глас „ Доста со мачкање очи со гордости и идентитети туку ајде конечно стокмете една ЕУ реформа, барем една“, од Зоран Иванов.
„Во суштина, образовниот систем што се применува во основните училишта директно придонесува за назадувањето на децата. Главната причина за оваа катастрофа што нѐ снајде е тоа што наставниците не се педагози и се нашле во оваа професија сосема случајно.“, БЛИЦ „ Образованието кај нас е мртво!“, од Назми Абдурахмани.
„Она што се случува во соседна Србија е еден доказ дека промената во појавноста донесува и нови формати кај етичноста. Младите на Балканот немаат веќе каде, некои велат можат „само да пукнат“ и тешко можат да го поднесат лицемерството на тешката корупција на властите.“, пишува Љубомир Костовски во колумната „ Естетика на протестите: Да се изградат нови етички критериуми во општеството“.
Подготви: Д. Тахири
