ТЕМА НА ДЕНОТ
Од денеска започнува мерката за поевтинување на над 1000 производи
Од денеска се очекува да поевтинат над 1000 прехранбени и непрехранбени производи откако во Службен весник се објавени одлуките на Владата за ограничување на бруто профитните маржи и за замрзнување на цените на дел од производите.
На самиот старт на владините одлуки, вчера реагираа од Комората на трговци на големо и на мало, од каде изразија загриженост и побараа повторно средба со премиерот Христијан Мицкоски и со министерот за економија и труд Бесар Дурмиши за да ги разгледаат последиците од овие одлуки.
Дел од маркетите веќе почнаа во пракса да ја спроведуваат одлуката на Владата за ограничување на бруто профитните маржи и за замрзнување на цените на дел од производите, која вчера излезе и во Службен весник, со што стана официјална и треба да важи до 30 април годинава.
Иако согласно одлуката од денеска се очекуваше да поевтинат над 1.000 прехранбени и непрехранбени производи во пракса во маркетите не се гледа некое забележително намалување на цените на производите.
Од Државниот пазарен инспекторат информираат дека од денеска нивните инспектори се на терен и ќе вршат контроли дали се почитуваат одлуките на Владата за ограничување на маржите и за замрзнување на цените на прехранбените производи.
Согласно Законот за трговија и Законот за заштита на потрошувачите, глобите за непочитување на овие две одлуки се движат од 500 до 10.000 евра, а сите неправилности може да се пријават на 191 или на www.dpi.gov.mk.
Светски ден на Социјалната правда, коинциденција или тактизирање со мерките, ЦИВИЛ посочува
ЦИВИЛ, како организација за човекови права и слободи, активна 25 години, го одбележува овој ден повеќе од една деценија, и денеска излезе со соопштение во кое, според организацијата, инклузијата, како тема на глобално ниво, никогаш не била под поголема закана.
„Ултра богатите и олигархијата се во поход да станат уште побогати од било кога, влијаат врз политиката и ги поддржуваат ултра десничарските структури насекаде низ светот. Тие се опасна закана за социјалната правда, демократијата и човековите права и слободи, дури и во земји со силна демократска традиција и социјална правда.
Северна Македонија е сиромашна држава во која социјалната правда, наспроти популистичките декларации на политичките елити, се наоѓа на последното место. Политичарите и власта дебатираат за промена на државниот грб и химна, дури и не кријат дека тоа им е приоритет, додека луѓето гладуваат. А промената на државниот грб ќе значи и дополнителен трошок, затоа што ќе треба да се менуваат и личните исправи.
Јавноста е сведок на тоа како власта тактизираше и одолговлекуваше да спроведе мерки за заштита на животниот стандард, за денес, токму на Меѓународниот ден на социјалната правда, да стапи мерката за замрзнување на цените на производите, откако цените претходно вртоглаво пораснаа.“, се наведува меѓу другото во соопштението од ЦИВИЛ.
РЕГИОН
Обвинителството на БиХ бара на Додик да му се забрани политичка дејност за 10 години и затворска казна
Обвинителството на Босна и Херцеговина побара Додик да биде казнет со затворска казна која е поблиска до максималната од минималната предвидена за ова кривично дело и 10-годишна забрана за политичка работа.
СВЕТ
Поранешниот потпретседател на САД, републиканецот Мајк Пенс контра Трамп: Господине претседателе, Украина не ја почна оваа војна
Поранешниот потпретседател на САД во првиот мандат на Трамп, и републикански сенатор Мајк Пенс во средата го нападна својот поранешен шеф, претседателот Доналд Трамп, поради неговите коментари за Украина и Русија.
Господине претседателе, Украина не ја „почна“ оваа војна. Русија започна неиспровоцирана и брутална инвазија која однесе стотици илјади животи. Патот до мирот мора да се гради на вистината.
АЛ-Прес
Во Европскиот парламент денеска на дневен ред и нацрт извештајот за Косово, во кој се бара отстранување на мерките воспоставени од ЕУ, известуваат косовските медиуми.
Во Албанија, СПАК најави истраги за изборен криминал, за што албанскиот премиер Еди Рама се спротивстави со тврдење дека не може да има истраги на партиите за време на изборна кампања. Во меѓувреме, од ЕУ порачуваат дека не смее да има политичко мешање о работата на СПАК.
Во денешното издание на АЛ-Прес одбравме колумна од косовскиот автор и аналилитчар, Енвер Робели, во која се осврнува на Минхенската безбедносна конференција и реакциите на европските политичари по неа.
ПРАШАЊЕ НА ДЕНОТ: Што мислите за замрзнувањето на цените?
СЛОБОДНА ЗОНА
Влегува Јане во редакција утрово и прашува – „Што? Трамп уште не ја нападнал Украина?“ Не, му велам, ќе нападне кога ќе добие команда од шефот, Путин. Овој утрински редакциски црн хумор се надоврза на еден разговор од претходната вечер, кога една универзитетска професорка ми кажа дека трампистите треба да го сменат натписот на своите капи во МРГА – Направете ја Русија величествена повторно (Make Russia Great Again), погледнете го видеото и прочитејте во ЕС-ПРЕССО- то од Џабир Дерала, „Капата на Трамп: MRGA – Make Russia Great Again“.
„Најчесто за социјална правда зборуваат и одлучуваат оние кои имаат брендирана облека и чевли, полн стомак и новчаник.
Лесно е да одлучиш да не се зголеми минималната плата ако имаш 2.000 евра плата + патни трошоци и дневници од разно-разни Комисии или патувања во странство.
Лесно е да не изгласаш да се купат нови автобуси во Скопје кога користиш службен автомобил или работата ти е на 5 минути пешки, па не знаеш како е да смрзнуваш на автобуските станици, до душа и во автобусите (кога ќе дојдат) редовно нема парно греење.“, пишува Дехран Муратов во колумната „А за стомакот ќе се зборува ли!?“.
Подготви: Д. Тахири
