ВЕСТ НА ДЕНОТ
Премиерот Димитар Ковачевски и вицепремиерот задолжен за европски прашања и главен преговарач на земјава со ЕУ, Бојан Маричиќ денеска во Брисел присуствуваат на последната сесија од скрининг процесот, која е посветена на Кластерот 6 кој ги опфаќа поглавјата „30 – Надворешни односи“ и „31 – Заедничка надворешна и безбедносна политика“.
Поглавје 30 се фокусира на заедничката трговска политика кон трети земји базирана на мултилатерални и билатерални договори и автономни мерки со цел постигнување правичен меѓународен систем за трговија кој ќе придонесе кон постигнувањето одржлив економски раст и обезбедувањето сеопфатен економски развој на среден и долг рок. Ова поглавје исто така ги вклучува и правилата на ЕУ во полето на хуманитарна помош и развојна политика. Претседателот на Владата, Ковачевски во своето излагање истакна дека Северна Македонија нема да бара преодни периоди, туку во целост ќе го прифати правото на ЕУ.
ИЗЈАВА НА ДЕНОТ
„На 9 декември, за само три дена, ќе го одбележиме Меѓународниот ден на антикорупција, а на 10 декември е Денот на човековите права. Овие два последователни датуми не се случајно одбрани. Нема човекови права и слободи таму каде што правдата е поразена од корупцијата. Антикорупцијата не е само правна или политичка тема и сигурно не е само процедура, туку и длабоко морално и етичко прашање што задира во фундаменталните човекови права и слободи. Ако сакаме да изградиме праведно општество засновано на највисоки етички вредности и интегритет, тогаш антикорупцијата треба да биде во средиштето на сите наши напори и политики“, изјави претседателот Стево Пендаровски на Отворен Форум за антикорупција организиран од Македонскиот центар за меѓународна соработка.
ВОЈНА ВО УКРАИНА
Украинскиот претседател Володимир Зеленски им го честиташе Денот на вооружените сили на Украина на припадниците на украинската војска, преку видео порака.
*
„Секој ден се заблагодаруваме за животот, Независноста, заштитата, силата, самопожртвуваноста, храброста, нескршливоста. Победа на славните Вооружени Сили на Украина“, порача украинската амбасадорка во Северна Македонија, Лариса Дир.
КОНФЛИКТИ
Американскиот државен секретар Антони Блинкен во текот на вчерашниот ден најави нова политика за спречување на екстремистичките израелски доселеници одговорни за насилството на Западниот Брег да дојдат во САД.
*
Од ЕУ најавија шест дополнителни летови со хуманитарна помош за Газа
ФЛЕШ ВЕСТИ
ПРАВДА ОЈО и Министерството за правда го подготвија барањето за екстрадиција на Љупчо Палевски. Се чека превод на турски јазик за да биде испратено до МНР Турција.
ЦРНА ЛИСТА Поранешниот вицепремиер Кочо Анѓушев ги негираше сите сомневања изразени од Стејт Департментот и најави дека ќе ја обжали одлуката за ставање на „црна листа“ поради негова вмешаност во значителна корупција.
ОБРАЗОВАНИЕ Информатичко-комуникациската инфраструктура во основните училишта во државата се унапредува. Во 40 од нив веќе е поставена нова, современа опрема преку која учениците ќе можат безбедно да пристапуваат до глобалната интернет мрежа со цел полесно да ги совладуваат наставните материјали, а истовремено да пребаруваат и дополнителни едукативни содржини, соопштија од МОН.
АЛ-ПРЕС
Редакциски избор од албански медиуми: Италија го одобри договорот со Албанија за мигрантите; Над 4 илјади конверзии на нелегални регистарски таблички во Косово; Советот на ЕУ ќе побара од Косово да стори повеќе за укинување на мерките
СЛОБОДНА ЗОНА
„Широк партиски и граѓански проевропски фронт и негова масовна гласачка поддршка е можна само доколку власта нај итно не се ослободи барем од дел од своите компромитирани и експонирано неспособни па и манифестно нестабилни извршни кадри меѓу кои некои министри, министерки, подминистерки, директори, директорки или, кажано во оваа една реченица, доколку власта предизборно не се ресетира без таквите свои партиски миленички и миленици стокмени во неколкуте важни сектори, посебно во сферата т.н. „општествена надградба“, ПО ДОПРЕН ГЛАС пишува Зоран Иванов „Широк Европски Фронт Да, но Прво …“
Подготви: Б. Јордановска