24 ЧАСА: Поднесени 71 барање за утврдување на одговорност против 123 судии; според Ѓуровски постојат безбедносни ризици и закани од случувањата на Блискиот Исток; можни големи промени во владата на Мицкоски

ВЕСТ НА ДЕНОТ

Извештајот за работата на Судскиот совет пред собраниска Комисија: Поднесени 71 барање за утврдување на одговорност за судија или претседател на суд против 123 судии

Во текот на 2023 година на дневен ред пред Судскиот совет биле ставени вкупно 473 претставки од граѓани и правни лица за работата на судовите и судиите, од кои разгледани се 74 проценти. Од разгледаните над 88 проценти или 349 претставки биле неосновани, додека 10 отсто или 41 претставка основани. Две претставки биле делумно основани и една претставка е повлечена од подносителот, се вели во извештајот за работата на Судскиот совет во 2023 година што денеска е пред собраниската Комисија за политички систем и односи меѓу заедниците.

ИЗЈАВА НА ДЕНОТ

Ѓуровски: Во овој момент безбедноста не е загрозена, но има безбедносни ризици и закани од случувањата на Блискиот Исток кои на индиректен начин може да влијаат

-Сметам дека во овој момент безбедноста на Македонија не е загрозена, но постојат безбедносни ризици и закани кои на индиректен начин на она што се случува на Блискиот Исток може да влијае во ЕУ, а со тоа и индиректно да има влијание и врз состојбата во Македонија. Потенцијални терористички напади, потенцијално движењето на луѓето кои биле дел од тие структури на Хезболах и т.н., но треба да бидеме одговорни. Нема потреба од страв, едноставно ние сме дел од колективниот безбедносен систем на НАТО и верувам дека како досега, и понатаму партнерите Америка и НАТО ќе ни помогнат за поголемо безбедносно превенирање, изјави Ѓуровски, одговарајќи на новинарски прашања по отворањето на дводневната конференција за „Влијанието на пролиферацијата на напредното конвенционално оружје на безбедноста и диверзификацијата на набавките и модернизацијата“.

РЕГИОН

Албанската опозиција повторно предизвика тензии пред албанскиот Парламент

Албанските опозициски демократски пратеници и денеска предизвикаа тензична ситуација, овој пат пред собраниската зграда, откако на исклучените пратеници, поради понеделничкото насилство, не им беше дозволено да влезат во објектот.

СВЕТ

Вашингтон пост: Нови детали за напорите на Трамп да ги поништи изборите во 2021

Тогашниот претседател Доналд Трамп се појави рамнодушен додека бунтовниците упаднаа во Капитол за да се обидат да го спречат трансферот на власта на 6 јануари 2021 година, велејќи му на помошникот „Па што? , обвинија обвинителите во новото експлозивно судско поднесување во четвртокот.

ГРАЃАНСКА АКЦИЈА

ПРАШАЊЕ НА ДЕНОТ: Зошто и по 29 години остана мистерија кој го изврши атентатот врз Киро Глигоров?

На 3 октомври пред 29 години, беше извршен атентат врз тогашниот претседател Киро Глигоров, кој го преживеа со тешки повреди на главата. Истражната постапка против непознат сторител сè уште е отворена. Прашање е зошто?

АНАЛИЗИ

Неофицијални извори во владата, кои побараа да останат анонимни, откриваат дека веќе во ноември се планира првата реконструкција во владата на Мицкоски, вклучувајќи и смена на врвот во Министерството за одбрана.

Според изворите, како најсериозен кандидат за нов министер за одбрана се споменува Драган Ковачки, кој во ноември го исполнува законскиот услов да биде носител на извршна функција во Владата. Ова наметнува едно алармантно прашање – дали е во најава милитаризација на ова министерство, имајќи предвид дека Ковачки, пред да стане пратеник во парламентот, беше активен армиски офицер со чин полковник, пишува Џабир Дерала во анализата „Анонимни извори за ЦивилМедиа откриваат можни големи промени во владата на Мицкоски: Се спрема ли милитаризација на врвот на Министерството за одбрана?„

Д. Мишев