Активни пожари, две жртви, Армијата се приклучи во гаснење на оганот
Според утринскиот извештај од Центарот за управување со кризи, активни се девет пожари на отворен простор заклучно со седум часот утринава, од вкупно 63 во текот на вчерашниот ден, под контрола се четири пожари, еден е локализиран, а 49 се изгаснати.
ЦУК соопшти дека се активни пожарите во Чучер Сандево – Блаце, Визбегово во Шуто Оризари Прилеп – село Бешиште, Македонски Брод, Црешнево и Локвица, село Рамне, Слатина и Ковче, и во општина Чашка
Локализиран е пожарот во Кочани, место викано Бабиште, помеѓу селата Јастребник и Полаки, со кој се зафатени ниска вегетација и мешана шума.
Според ЦУК, под контрола се пожарите во Делчево на Градска депонија „Острец“, во Виница – село Драгобраште (ниска вегетација и нискостеблеста шума), во Крива Паланка – село Градец и село Лозаково (борова, дабова и багремова шума) и во Желино – селоЛарце – различна локација (мешана шума).
АМСМ изутринава соопшти дека сообраќајот на потегот од клучка Орман до клучка Мирковци е пуштен за редовен сообраќај, исто така и на потегот Скопје-ГП за ГР Блаце и во двата правца на експресениот пат Ранковце-Крива Паланка. Сообраќајот на овие патишта беше во прекин поради пожарите.
Поради состојбата со пожарите во Владата синоќа заседаваше Кризниот штаб, а активиран е и европскиот механизм за помош во справување со пожарите.
Армијата на Република Северна Македонија излезе со соопштение за нивната улога во гаснењето на пожарите што беснеат низ територијата на целата држава.
Согласно одлуката на претседателката Гордана Сиљановска-Давкова за учество на Армијата во гаснењето на пожарите одлуката за кризна состојба донесена од Владата и побарувањата на Центарот за управување со кризи Армијата се вклучи во гаснење на пожарите со над 150 припадници.
Во рамки на засилените активности на полицијата поради пожарите во скопскиот регион, на 9 јули во 23:40 часот полициски службеници од ЕВР Гази Баба на подрачјето кај месноста Ајватовски рид, кај Илинден, извршиле преглед на три малолетни странски државјани. Во нивниот ранец биле пронајдени две шишиња бензин (по 1,5 литар), две петарди, запалка и течен лепак. Малолетниците веднаш биле приведени.
Во пожарите што ја зафатија земјата, животот го загубија две лица, кај Ѓорче Петров и во кривопаланечко.
ИЗЈАВА НА ДЕНОТ
Рокас: Членството во ЕУ е најсилна гаранција за заштита на идентитетот и јазикот
Треба да се нагласи дека овие прашања – идентитетот и јазикот – не се предмет на преговарачката рамка. Тие најдобро се заштитуваат преку полноправно членство во Европската унија, изјави Евроамбасадорот Михалис Рокас, кој денеска од Охрид изрази поддршка за Извештајот на Европскиот парламент, оценувајќи го како поттик за евроинтегративниот пат на земјава.
РЕГИОН
Лисица: Геноцидот и територијалната експанзија кон Босна и Херцеговина
„Факт е дека врз Бошњаците се спроведува десеттата фаза од геноцидот, што подразбира негирање. Јасно е дека официјалната српска политика во Белград намерно учествува во овој нехуман и нечесен чин насочен против Бошњаците“, пишува Адмир Лисица, регионален истражувач за политички односи и историчар од БиХ, на својот Фејсбук профил.
Лисица во својата колумна за Радио Сараево, зборува за геноцидот и територијалната експанзија кон Босна и Херцеговина, по повод одбележувањето 30 години од геноцидот во Сребреница.
СВЕТ
Смртоносни напади врз Кијив, Русија продолжува со бомбардирањето на Украина втора ноќ
Русија започна голем воздушен напад врз главниот град на Украина, Кијив, рано утрово во четврток, што претставува втора ноќ по ред на жестоки напади врз земјата, додека Русија го засилува бомбардирањето повеќе од три години по почетокот на војната, јавува Си-Ен-Ен.
САД воведуваат санкции против функционерката на ОН Франческа Албанезе, фокусирана на човековите права на Палестинците
Во објава на X, Рубио рече дека ги воведува санкциите против Франческа Албанезе, која ја носи титулата специјален известувач на ОН за состојбата со човековите права на палестинските територии, „за нејзините нелегитимни и срамни напори да поттикне акција (на Меѓународниот кривичен суд) против американски и израелски функционери, компании и раководители“.
ПРАШАЊЕ НА ДЕНОТ
Што мислите за работата на Стојанче и Мухамед Али?
СЛОБОДНА ЗОНА
„Помеѓу европски извештаи без македонски јазик и идентитет и оган што не запира, Македонија стои горда, но осамена. Се чини дека „европскиот пат“ станува сè повеќе пат низ пепелта. Или што би рекол Балашевиќ во една песна: „Патувај Европо немој повеќе да чекаш на нас…“, пишува Дехран Муратов во колумната „Во Македонија гор(д)и, чао Европо“.
„Историјата нема да ги запамети изговорите, туку резултатите. И додека Македонија одново и одново се врти околу сопствената оска, Албанија веќе го минува крстопатот“, пишува Дестан Јонузи во колумната „Македонија заглавена – Албанија чекори напред: Владата на Мицкоски го блокира европскиот пат“
Подготви: Д. Тахири
