ТЕМА НА ДЕНОТ
Изборна едукација – Правото на глас
ЦИВИЛ секојдневно, од распишувањето на изборите на 9 август објавува едукативни текстови „Што е што во изборен контекст“ за клучните прашања во пресрет на локалните избори во октомври.
За гласачите најбитно е нивното избирачко право. Тоа е основно демократско и човеково право, преку кое граѓаните учествуваат во избор на претставници во државната и локалната власт.
Во Северна Македонија, ова право е гарантирано со Уставот и детално уредено со Изборниот законик. Основни принципи се: еднаквост, општост, тајност и непосредност на гласањето. Претседателот на Републиката, пратениците, членовите на советите и градоначалникот на општината се избираат на општи, непосредни и слободни избори, со тајно гласање.
Никој не смее да го повика избирачот на одговорност заради гласањето, ниту пак од него да бара да каже за кого гласал или зошто не гласал.
ИЗЈАВА НА ДЕНОТ
„Се е можно, можно е гласчкото ливче да биде 7 – 8 метри, да ги обесхрабри граѓаните да излезат, да се намали цензусот, но тука закам да предупредам дека согласно Уставот и Законот ако не е успешен избирачкиот процес Владата е таа која именува владини повереници, така што неодговорнто однесување на поединци или поедини политички партии ќе резултира со ваков тип на можности. Сега дали тоа ќе се случи ќе видиме за многу скоро од денеска, до 1 сепетември треба да заврши овој процес и да се види каков ќе биде“, изјави премиерот Христијан Мицкоски.
РЕГИОН
Суровата реалност на протестите во Србија: Полициска бруталност, закани, селективни апсења
Хаос на улиците, полициска бруталност, закани од највисоките власти кон оние што излегуваат на протести, селективни апсења на граѓани, вклучително и членови на парламентот – ова е реалност во Србија во последните неколку месеци, особено во последните денови. Го забележуваат тоа и во Европската Унија, има сè повеќе луѓе кои гласно зборуваат за тоа, па дури и се осмелуваат да ја споредат Србија со една од најголемите диктатури на европскиот континент – Белорусија.
СВЕТ
Израел ja започна првaта фаза од офанзивата врз градот Газа
Палестинците бегаат од делови од градот Газа откако израелската војска ги започна првите фази од планираната копнена офанзива, велат официјални лица во градот. Израелските трупи воспоставија упориште на периферијата на градот – кој е дом на повеќе од еден милион Палестинци – по денови интензивно бомбардирање и артилериски оган.
ПРАШАЊЕ НА ДЕНОТ: Што мислите за цените и услугите на приватните болници?
Денешното ПРАШАЊЕ НА ДЕНОТ на ЦИВИЛ ја актуелизира темата за условите во приватните болници и колку граѓаните плаќаат, кога ќе се одлучат своето здравје да го доверат на приватното наспроти државното здравство.
СЛОБОДНА ЗОНА
„Ќе понудат ли нови програми и постапки за санација на долговите на локалните претпријатија . Она што досега го правеле не донело резултат на тоа поле. Ако ја бараат довербата на граѓаните треба да кажат како ќе се намалат милионските долгови кои нема сами од себе да се намалат. Вториот мандат секогаш е можност за решавање на крупните проблеми во општините. За такви постапки имаат веќе четиригодишно искуство“, пишува Војо Маневски во „Треба ли кандидатите за локална власт да поминат задолжителна обука?“
Подготви: Б. Јордановска
