ВОЈО МАНЕВСКИ
Кога започнува кампањата? Кога се предлага и се брани концептот со проектите кои ги предлага кандидатот?
Законот тоа го одредил на дваесет дена пред денот на изборите . Кај нас се ѐ релативизирано па и траењето на кампањите. Всушност, ние постојано сме во некаква кампања, судејќи според тонот и пристојноста на прес конференциите на политичките репрезенти. Престана веќе да нѝ смета ниското ниво на пристојност во нивната комуникација а за одговорноста за изреченото и да не разговараме. Неа ја нема.
Тоа очигледно го апсолвиравме како нормална политичка борба не разбирајки дека партиите веќе не се борат меѓусебе туку со нас граѓаните. Секоја власт има свои аномалии, ама тие не смеат да станат државни болести. Ако тоа го прифаќаме како нормалност тогаш што се чудиме на нашите млади кои нѐ напуштаат не прифаќајки таква нормалност.
За два месеца се локалните избори. Ќе избираме градоначалници и Совети на општините. Уште сега можам да предвидам како ќе изгледа првиот работен ден на новите градоначалници кои нема да се дел од досегашната партија на власт: „се соочуваме со катастрофална финансиска состојба во општината“. „Нашите претходници со недомакинско работење оставија пустош“.
Таму каде ќе продолжи истата партиска номенклатура патетично ќе ветува продолжување на добрите политики и засилено темпо на реализација на започнатите или ветените проекти.
Во првиот случај новите власти како да дошле од некоја друга држава и немаат појма какви се состојбите. Во опозиција постојано изнесуваат во јавност разни податоци од работењето на власт, а кога ќе дојдат на власт се чудат за состојбите. „Изненаѓени“ и „увредѓени“. Најчесто и тие до изборите се некакви советници или шефови на локални ограноци на партија и имале можност да се запознаат во состојбите во локалната власт. За волја на вистината објавени се долговите на сите општини во државата и долговите на сите локални претпријатија . Сите знаеме дека тоа е пазарната цена на партизацијата на овие битни претпријатија за функционирањето на општините. Сите знаеме ама се лутиме кога не нѝ се чисти улиците или имаме постојан недостаток на вода и други комунални потреби. Молчиме затоа што некаде во нашата свест е ставен стравот од власт и властодршци. Не се закачувај со државата велат моите штипјани . Е после чорба македонче.
Ако веќе сериозно се борите за локалната власт почитувани кандидати и кандидатки, излезете со програми, мерки за санација на долговите и подигање на ефикасноста на локалните претпријатија. Нешто што по дефиниција би била ваша обврска доколку ви ја дадат довербата граѓаните. Не нѝ кажувајте колку крадела сегашната власт и дека ќе одговараат ако вие дојдете на нивно место. Тој филм веќе не ѐ ни за журнал. Местото му е меѓу патетичните цртани филмови како оној за Калимеро. Наместо тоа побарајте ги на увид и изнесете ги пред јавноста податоците за доспеаните и договорените обврски на општината кои ќе треба да се раеализираат од буџетот. Тоа право ви го дава законот, а секако имате и советници кои според деловникот можат да ги барааат тие податоци. Така квалитативно ќе се подобри кампањата и граѓаните ќе имаат порелеванти податоци за својот избор на следната локална власт. Се сѐ плашам дека според досегашната практика ќе правите митинзи и средби со своите членови каде ќе нема граѓани што не се дел од вашата партија и се ќе остане по старо.
Според некои проценки добар дела од досегашните локални власти имаат шанса да добијат уште еден мандат. На што ќе ја темелат својата понуда? На проектите кои ги реализирале, а кои се според закон нивна обврска? Наместо да се расплинуваат со десетина крупни проекти, многу подобро е да излезат пред граѓаните со два големи проекти кои се значајни за граѓаните. И што е најважно од се, ѐ да понудат нова програма и политика која нема да ги повторува грешките од претходните четири години. Вистинското прашање од граѓаните треба да биде, како да се вклучат сите човечки ресусрси во реализација на крупните проекти за да се избегне партиската припадност како објективно ограничување за каптажа на младите и образовани кадри.
Ќе понудат ли нови програми и постапки за санација на долговите на локалните претпријатија . Она што досега го правеле не донело резултат на тоа поле. Ако ја бараат довербата на граѓаните треба да кажат како ќе се намалат милионските долгови кои нема сами од себе да се намалат. Вториот мандат секогаш е можност за решавање на крупните проблеми во општините. За такви постапки имаат веќе четиригодишно искуство.
За листите за советници нема потреба да се пишува зошто без измена на законот тие се сопственост на партиите кои ги предложуваат. Граѓаните се должни да гласаат онака ѓутуре, па што биде нека биде. Додуша Советите и не одлучуваат нешто посебно кога се на власт со градоначалникот од истата партија. Ако таа партија е и на централна власт тогаш се дигаат два прста и се чека да се исплати паушалот.
Колку независни кандидати ќе учествуваат во кампањата ќе видиме. Досега не беа прифаќани од истата биолест од која боледуваат балканските народи. Колективноста им дава некаква сигурност додека индивидуалноста бара и лична одговорност за кажаниот став или избор. Е овде сме тенки мои почитувани сограѓани од сите етноси и вери. Затоа и постојано кукаме за некакво единство плашејки се од лична одговорност.
Ете, кажав што кажав, како иницијатива во следниве неколку недели да се направи некаква обука за сите заинтересирани кандидати за носители на локалната власт. Ако ништо друго да немаат аргументи по изборите да се чудат какви се состојбите во локалната самоуправа.
А ние почитувани сограѓани никако да научиме дека од секое дрво свирка не се прави. Врба треба и тоа во пролет кога се млади фиданките.
