ВЕСТ НА ДЕНОТ
Родители на починатите во пожарот во Кочани бараат од ОЈО појаснување на обвинението
Родители на починатите во пожарот во клубот „Пулс“ денеска до Основното јавно обвинителство (ОЈО) Кочани ќе достават писмено барање за детално објаснување против кого ќе се води обвинителната постапка, што ја соопшти минатата недела државниот јавен обвинител Љупчо Коцевски.
– Ние не сме правници и не го разбравме обвинителниот акт што го соопшти јавниот обвинител против осомничените за трагедијата во „Пулс“, поради што бараме Основното јавно обвинителство да ни ги објасни резултатите од истражната постапка, порачаа родителите на починатите во пожарот на деветтиот „Марш на ангелите“ што се одржа завчера во Кочани.
ИЗЈАВА НА ДЕНОТ
Тошковски: Македонија е безбедна држава, jа намаливме стапката на криминал во државата
„Мислам дека македонските граѓани прават разлика помеѓу она што го начекавме, она што го оставија овие пред нас и она кое што ние го работиме сега. Сметам дека сите оние акции кои што ги спроведовме како од аспект на борба против организиран криминал и особено висока корупција и злоупотреба на државни институции во минатото, сите оние акции кои што ги спроведовме во делот на уличниот криминал, потоа на борбата против трговија со дрога, трговија со луѓе, бандите кои што ги разбивме, му даваат една надеж на македонскиот народ дека можело и поинаку. Гледаат дека со посветеност, со макотрпна работа, со професионален пристап можело и поинаку и да се дадат резултати“, изјави министерот за внатрешни работи Панче Тошковски.
РЕГИОН
Студентите ќе поднесат кривична пријава против Вучиќ
Студентите во блокадата на овие два факултета ќе поднесат кривична пријава против претседателот на Србија за сериозни прекршувања на законот и Уставот, на 17 март 2025 година, на одделението за интензивна нега на Универзитетскиот клинички центар на Србија.
СВЕТ
Војната помеѓу Израел и Иран може да ѝ даде економски поттик на Русија за да ја продолжи агресијата врз Украина
„Превентивните“ напади на Израел врз Иран, насочени кон нуклеарната програма на земјата и убивањето на врвни воени функционери, би можеле да имаат далекусежни импликации за Украина и би можеле да ја зголемат способноста на Русија да продолжи со својата целосна инвазија, изјавија експерти за „Кијив Индепендент“.
Иран е еден од најцврстите сојузници на Русија во текот на целата војна, обезбедувајќи илјадници беспилотни летала „Шахед“ и балистички ракети со краток дострел.
Во меѓувреме, САД долго време се најсилниот поддржувач на Израел и секоја ескалација на конфликтот веројатно ќе предизвика понатамошни промени во геополитичките приоритети на Белата куќа.
ПРАШАЊЕ НА ДЕНОТ: Дали верувате дека стапката на криминалот е намалена?
АЛ-ПРЕС
Во денешниот редакциски избор на ЦивилМедиа од албанските медиуми во регионот прочитајте:
-Тирана денеска домаќин на самитот на ПСЈИЕ – Албанија го предава претседателството на Бугарија
– Барањата за азил од Албанците во ЕУ се намалија за 29%
– Косово без нов парламент и по 32 обиди
– Судот во Хаг повторно му го продолжи притворот на Тачи
– Одржано првото рочиште за масакрот во Меја
Колумна –„Покана за претпазлив оптимизам“
СЛОБОДНА ЗОНА
„Кампањата против Љупчо Коцевски веднаш се појави на клучните медиуми наклонети кон Мицковски ама мора да се знае дека тој притисок има и друг крај, кој се виде во саботата во Кочани. Има и друга јавност.“, Брза пошта од Љубомир Костовски „Власта го помина Рубиконот“.
„Што мислите, го познава ли Мицкоски поранешниот претседател на нашата партија ВМРО-ДПМНЕ и премиер на Македонија, Груевски? Наскоро ќе дознаеме дека само слушнал за него дека бил претседател на партијата чии сукцесор е самиот Мицкоски и дека го сретнал неколку пати на седници на ИК, кога му беше Генерален Секретар на Груевски, а слушнал дека бил и претседател на владата на ВМРО-ДПМНЕ од 2006 до 2016 година, кога му беше советник за енергетика, ама не стигнал да го запознае.“, пишува Оливер Андонов во колумната „Лаги“.
„Секој ден мислам на тебе. Секој ден те спомнуваме во Редакција. За тебе знаат и новите колешки и колеги. Кога би се појавил од некаде, ќе биде како никогаш да не си заминал. Во изминатите две години не еднаш ми се случи да посегнам по телефонот да ти се јавам да се консултирам со тебе за важни прашања. И тогаш, во дел од секунда, ти си тука, присутен и реален, за веднаш потоа да настапи големото Отсуство.“, Ин мемориам од Џабир Дерала – „Две години без Крешник“.
Подготви: Д. Тахири
