ВЕСТ НА ДЕНОТ
СДСМ го обвинува Меџити за незаконско работење, тој негира дека постапувал незаконски, Владата ги отфрли наводите на шпекулациите
Портпаролката на СДСМ, Богданка Кузеска, достави документи до Владата со кои тврди дека вицепремиерот и министер Изет Меџити работел незаконски. Таа го отвори и прашањето за земање мито со вакво постапување. За Мицкоски пак, рече дека постапувал и како обвинител и врховен судија.
Вицепремиерот и министер за животна средина и просторно планирање, Изет Меџити, истакна дека не направил ништо незаконски, а за СДСМ кои пред Влада доставуваат документи до премиерот Христијан Мицкоски за незаконско работење вели: „Сакаат да ја продолжат приказнава. Не може архивска работа да се прикаже како голем скандал. Ако сакаме да зборуваме за скандали, ги имаше доста до сега“.
Од Владата соопштија дека ги провериле и ги отфрлиле како неточни наводите изнесени од СДСМ и ДУИ во врска со работата на Министерството за животна средина и просторно планирање.
-Владата ги провери и затоа ги отфрла шпекулациите и неточните наводи изнесени од СДСМ и ДУИ во врска со работата на Министерството за животна средина и просторно планирање. Инспекцискиот надзор спроведен од Управниот инспекторат се однесува на аспекти на архивското работење и не утврдил незаконско постапување.
ИЗЈАВА НА ДЕНОТ
Украина се заблагодари и го поздрави усвојувањето на резолуцијата на ОН за сеопфатен, праведен и одржлив мир
На 24 февруари 2025 година, Генералното собрание на ОН усвои резолуција „Унапредување на сеопфатен, праведен и одржлив мир во Украина“, која претставува уште еден цврст сигнал од меѓународната заедница во поддршка на суверенитетот, независноста, единството и територијалниот интегритет на Украина во нејзините меѓународно признати граници, вклучувајќи ги и нејзините територијални води. 93 држави гласаа „за“, 18 „против“, а 65 држави се воздржаа, соопшти Министерството за надворешни работи на Украина.
„Го поздравуваме усвојувањето на овој документ, со кој земјите-членки на ОН ја потенцираат неопходноста од постигнување на сеопфатен, праведен и одржлив мир во Украина во согласност со Повелбата на ОН, вклучително и нејзините принципи на суверена еднаквост и територијален интегритет на државите, како што е нагласено во резолуцијата ES-11/6 од 23 февруари 2023 година“, пишува во соопштението на украинското МНР.
РЕГИОН
Вучиќ се извинува: Србија направи грешка што гласаше „ЗА“ резолуцијата во ОН, требаше да се воздржи
Српскиот претседател Александар Вучиќ изјави дека Србија направила грешка со гласањето за резолуција во Генералното собрание на Обединетите нации со која се потврдува поддршката за Украина и нејзиниот територијален интегритет.
СВЕТ
САД на страната на Русија во резолуциите на ОН за Украина
Прво, САД се спротивставија на европската нацрт-резолуција со која се осудуваат постапките на Москва и се поддржува територијалниот интегритет на Украина – гласајќи на ист начин како Русија и земјите, вклучувајќи ги Северна Кореја и Белорусија, на Генералното собрание на ОН (UNGA) во Њујорк.
Потоа, САД подготвија и гласаа за резолуција во Советот за безбедност на ОН, која повикуваше на прекин на конфликтот, но не содржеше критики за Русија.
ПРАШАЊЕ НА ДЕНОТ: Дали Мицкоски ја води земјата во изолација?
СЛОБОДНА ЗОНА
„Мицковски, како своевиден продавач на стари автомобили (според некогашниот висок американски функционер О’Браен) кому Вашингтон не му веруваше (не би купил стар автомобил ако Мицковски е продавач, да потсетам) мисли дека Трамп би бил полесен купувач на неговата политика. Но, тој не знае дека Трамп може да биде заинтересиран само да ти продаде автомобил, а не да покаже било каков респект за нашите понуди. Освен ако тие наши нудења се без обврска, како ова со поддршката на американскиот предлог во ОН околу украинската криза.“, пишува авторот Љубомир Костовски во „Кога ќе обезбедиш паркинг во Вашингтон“.
„Државата не може да биде демократска. Ако е демократска, тогаш ќе биде крајно неефикасна. А неефикасноста води кој неспокој, нарушување на здравјето…
Демократијата ги тера луѓето да размислуваат. А штом размислуваат, тие дебатираат. А штом дебатираат, тие се во стресна состојба.
Заради тоа, треба да се одлучува за важните стратешки и државни прашања на тоа ниво – во тесен круг од луѓе. Не дека е наша работа, но еве, најточно, одлуките се носат во тесен круг во мозокот на еден човек.“, прочитајте и слушајте во новото видео #esPRESSo на Џабир Дерала „Нежна е грижата на власта за луѓето“.
Подготви: Д. Тахири
