ВЕСТ НА ДЕНОТ
Генералниот секретар на НАТО, Марк Руте одлучи да ја назначи Радмила Шекеринска од Северна Македонија за следен заменик генерален секретар, соопштија од прес службата на Алијансата.
„Среќен сум што можам да го објавам именувањето на Радмила Шекеринска за следен заменик генерален секретар. Таа е вистински верник во НАТО, ја знае работата што е потребна за да се приклучи на Алијансата и што значи да се биде полноправна членка. Со нетрпение очекувам да работам со неа додека ја презема оваа витална улога“, објави Руте.
Шекеринска истакна дека и претставува привилегија да и служи на НАТО Алијансата.
Шекеринска претходно беше вицепремиер за европски интеграции и министер за одбрана на Северна Македонија, вклучително и пред влезот на земјата во НАТО Алијансата во 2020 година. Таа ќе ја преземе својата функција подоцна оваа година.
ИЗЈАВА НА ДЕНОТ
Агелер: Честитки до Шекеринска идниот заменик-генерален секретар на НАТО
„Чеситки до Радмила Шекеринска идниот заменик-генерален секретар на НАТО, како и до премиерот Христијан Мицкоски и за Владата на Северна Македонија за застапување на нејзината кандидатура. Моќен доказ за стручноста и искуството на Шекеринска и на улогата на Македонија како ценет сојузник на НАТО и партнер на САД, напиша Агелер на мрежата Х.
СВЕТ
Во време кога целосната неиспровоцирана руска воена агресија врз Украина трае веќе илјада дена, со несмалена жестина продолжуваат руските ракетни и артилериски напади врз цивилни цели низ Украина.
Бројот на повредени во последниот рускиот ракетен напад на Одеса на 18 ноември надмина педесет, додека истовремео се потврдени 10 загинати.
„Повеќе од 50 луѓе се повредени како резултат на ракетниот напад врз градот Одеса, за жал, има жртви“, објави Одделот за здравство на регионалната воена управа на Одеса на Фејсбук, според Укринформ.
РЕГИОН
САД: БиХ далеку од ЕУ поради корупција и етнонационализам
Политичката состојба во Босна и Херцеговина е длабоко загрижувачка, а земјата ќе мора да чека со децении за членство во Европската Унија доколку политичарите продолжат со сегашното однесување, изјави американскиот амбасадор во Сараево Мајкл Марфи.
ГРАЃАНСКА АКЦИЈА
ЦИВИЛ – Центар за Слобода: 1000 денови руска агресија, 1000 денови Украински Хероизам
Но покрај сите овие ужаси, светот е сведок на 1000 денови невиден хероизам на украинската нација. Секој ден е впишан во светската историја како ден на истрајност, пожртвуваност и непоколеблив дух во борбата за слобода.
Светот памети и тоа дека војната за Украина не почна во 2022 година, туку во 2014 година, кога руските паравоени формации спроведоа нелегална окупација на Крим и делови од Донбас – криза што светот се обиде да ја „заборави“, до моментот на целосната воена агресија.
ЦИВИЛ уште еднаш најостро го осудува руското грозоморно злосторство на агресија, систематските воени злосторства против цивилите и воените заробеници, и нападите врз животната средина и цивилната инфраструктура.
СЛОБОДНА ЗОНА
„Европа треба да преземе одговорност за себе и за својата иднина, за иднината на демократијата и слободата на Стариот континент. Воедно, европските демократии имаат обврска кон своите граѓанки и граѓани да ги одбранат од хибридните операции на влијание и субверзии што ги спроведува Путинова Русија и прокси актерите во служба на злото. Тоа е ескалација! Воените агресии и хибридната војна под команда на Путин се ескалација, а не одбраната на слободата и демократијата.
Европските лидери мораат да сфатат дека треба да заборават на стравот од „ескалација“, туку да ја интензивираат воената поддршка на Украина и да ги симнат сите непотребни ограничувања за употреба на оружјето“, пишува Џабир Дерала во анализата „Нова фаза во војната за ослободување на Украина: Ескалација или задоцнет одговор на руското брутално злосторство на агресија?“.
Д. Муратов
