Јавни собири за оддавање почит на жртвите од Кочани и барање одговорност
Една недела по трагедијата во Кочани, каде во пожарот во дискотеката „Пулс“ загинаа 59, а околу 200 лица се повредени, низ градовите во земјата се одржуваат јавни собири во кои граѓаните оддаваат почит на починатите и бараат одговорност од одговорните институции за пропустите кои доведоа до оваа трагедија.
За денеска беа најавени три јавни собири. Во 11:30 во Тетово се одржа јавен собир во организација на инцијативата „Нула“, за изразување револт поради голем број трагедии со цел да се побара одговорност. Граѓаните се собраа на плоштадот половина час по пладне, по што групата се движеше до зградата каде функционираат Основен суд во Тетово и Основното Јавно Обвинителство.
Обраќања имаа претставници на семејствата чии членови ги загубија животите во пожарот во модуларната болница во Тетово и во сообраќајната несреќа на автобусот на Беса Транс во Бугарија.
Денеска на УКИМ требаше да се одржи студентски пленум, но студентите одлучија да го затворат за јавноста, не дозволувајќи присуство на новинари. Пленумот се одржа во Филозофскиот факултет, а студентски претставник изјави дека никој не дал дозвола за снимање и фотографирање.
Според агендата, студентите планирале 15-минутен молк и неколку интерактивни зони за изразување на ставови. Дел од медиумите најавија дека ќе ги бојкотираат нивните идни собири.
По настанот, се појави допис од Независниот студентски сојуз, во кој се осудува обидот на политичката партија Левица да го „киднапира“ собирот, нарекувајќи го фијаско. Најавија и кривична пријава против лица кои се претставувале лажно во нивно име.
Иницијативата „Кој е следен“ најави јавен собир на Плоштад Македонија, со почеток во 18:30 часот.
Од „Koj е следен?” нагласуваат дека се изрично против секаков вид на насилство и провокации и се оградува од било каков повик, скандирање (говор на омраза) или однесување кое има за цел да го наруши јавниот ред и мир, и ја објавија рутата, временскиот распоред и правилникот за однесување на маршот.
ИЗЈАВА НА ДЕНОТ
Муртезани: Пристигна првата транша од ЕУ во висина од 52,4 милиони евра, 7% од вкупната сума на финансиска помош за земјата
„Пристигнаа средствата од пред -финансирањето во рамките на Инструментот за реформи и раст од страна на Европската комисија, траншата е во висина од 52,4 милиони евра, односно 7% од вкупната сума на финансиска помош за земјата, која што како што знаете, изнесува околу 750 милиони евра“, изјави министерот за европски прашања Орхан Муртезани на прес-конференција.
РЕГИОН
Стотици уапсени во Турција во новите протести поради приведувањето на Имамоглу
Стотици луѓе се приведени во новите протести против приведувањето на градоначалникот на Истанбул, Екрем Имамоглу.
Турското Министерство за внатрешни работи на „Х“ напиша дека 323 лица биле приведени поради бранот демонстрации вчера.
Протести се одржаа во Истанбул, Анкара, Измир и други градови, со илјадници учесници и покрај забраните за демонстрации.
СВЕТ
САД и Русија на разговори за Украина во Ријад, додека продолжуваат руските нападите со дронови врз цивилите
Во Саудиска Арабија се водат разговори меѓу американски и руски претставници за евентуален мировен договор во Украина. Тие следат одвоени разговори меѓу Украина и САД во Саудиска Арабија, кои украинскиот министер за одбрана ги нарече „продуктивни и фокусирани“.
Истовремено, продолжија руските напади врз Украина во текот на ноќта, при што властите во Кијив соопштија дека Русија лансирала 99 нападни беспилотни летала. Во напад на руски дронови на Кијив изминатиот викенд загинаа три лица, меѓу кои и едно петгодишно дете
ПРАШАЊЕ НА ДЕНОТ: Што мислите за кампањата против јавните собири?
АЛ-ПРЕС
Редакциски избор од албанските медиуми во регионот: Дваесет и шест години од интервенцијата на НАТО за Косово; Продолжува судскиот процес против поранешните лидери на ОВК; Законот за пензии на Албанија со Италија подготвен за имплементација
СЛОБОДНА ЗОНА
„Корупцијата кај нас е одамна во зона на самоодржливост. Оттаму при драматични настани од овој тип истрагата тешко може да биде објективна ако актуелната влада треба да ја води бидејќи лесно може да замижи над сопствената одговорност. На ова опоменуваат светските искуства. А народот веќе веднаш почна да реагира, има искуство од порано и веднаш се сомнева во исходот на истрагата“, пишува Авторот Љубомир Костовски во колумната „Народниот гнев како змија во пазувите на власта“.
Подготви: Д. Тахири
