ВЕСТ НА ДЕНОТ
Над 150 милиони евра од унгарскиот кредит преку комерцијалните банки се префрлени кај бизнисот, а за локалните самоуправи годинава се предвидени околу 200 милиони евра. Со вториот повик за општините и потпишувањето на договорите ќе се заокружи вкупната сума средства земени од унгарскиот кредит – за враќање стари долгови и за развој и капитални инвестиции на државата.
ИЗЈАВА НА ДЕНОТ
„НАТО нема да се откаже од помошта за Украина, а Хрватска е вреден и доверлив сојузник во тие напори. Русија го поткопува меѓународниот поредок, европската безбедност и главната цел на Алијансата – безбедна евроатлантска зона. Затоа ја поддржуваме не само територијалната целовитост и суверенитет на Украина, туку и нејзиното право и способност за самоодбрана“, изјави заменичката генерален секретар на НАТО, Радмила Шекеринска, во интервју за хрватската агенција Хина.
РЕГИОН
Србија повторно не ги почитува санкциите на ЕУ против Русија
Србија повторно не ги почитува рестриктивните мерки на Европската Унија против Русија поради војната во Украина, објави канцеларијата на високиот претставник за надворешна и безбедносна политика на 14 јули. Станува збор за одлуката на ЕУ да ги продолжи санкциите против Русија до 31 јануари 2026 година
АЛ-ПРЕС
Редакциски избор од албански медиуми: Рама најавува нов систем за снабдување со нафта; Велиај одбива да поднесе оставка од функцијата градоначалник; Блокирани 882 милиони евра поради неконституирањето на косовското собрание
СВЕТ
Ирска: Започна ископување на масовна гробница со останки од 800 бебиња
Во ирскиот град Тјум, во округот Голуеј, денеска започна ископувањето на масовна, необележана гробница за која се верува дека содржи останки од околу 800 бебиња. Гробницата датира од периодот меѓу 1925 и 1961 година, кога католичките калуѓерки од редот „Бон Секур“ ги закопувале починатите новороденчиња од институцијата за мајки и деца „Света Марија“.
ПРАШАЊЕ НА ДЕНОТ: Колку безбедно се чувствувате?
СЛОБОДНА ЗОНА
„Одговори – нема. Оставки – уште помалку. Министерот за внатрешни работи Панче Тошковски, чиј ресор е токму јавната безбедност, сè уште не понуди никаква морална или политичка одговорност. Нема конкретен план за справување со растечката несигурност и небезбедност на улиците. Се чини како да е прифатена една тивка и страшна реалност што би рекол Тошковски дека „убиства имало и ќе има“, но оставки нема да има. И не само од актуелниот министер, морални оставки немало ниту во минатото од претходните влади“, пишува Дехран Муратов во „Убиства имало и ќе има – оставки немало и ќе нема“.
„Убиства на деца, воени заробеници, тортура и изживување врз луѓето – се знак дека русите се надвор од цивилизацискиот простор. Очигледно, зад тие кремљовски ѕидини не се читаат ни Женевските конвенции, ни Повелбата на ОН. Очигледно е дека единствениот начин да се надмине руската „дислексија“ во овој случај се ракетите, дроновите, санкциите и притисокот врз рф“, низ дипломатска призма пишува украинската амбасадорка Лариса Дир во „Право на живот за време на војна. Против злосторствата на рф.“
Подготви: Б. Јордановска
