ВЕСТ НА ДЕНОТ: ВМРО-ДПМНЕ го повлече видеото во кое го злоупотребува логото на Слободен печат
Партијата ВМРО-ДПМНЕ ги злоупотреби логото и жигот на „Слободен печат“ во видео-спот пласиран на социјалните мрежи.
Главен „актер“ во видео-материјалот е потпретседателот на партијата, Александар Николоски, кој седнат на биро го разгледува дневниот печат, односно насловната страница на „Слободен печат“ и ја користи таа насловница како амбиент за да го почне своето излагање против политичкиот опонент Зоран Заев. Станува збор за насловна страница на која „Слободен печат“ информира за развојот на судењето на аферата „Рекет“. Оваа насловна страница е дел од сценарио од спот за предизборна пропаганда на партијата, во која фокусот е ставен на шиканирање на владеењето на политичките противници, критика на судството и обвинителството. „Фатени се живи!“, драматично го почнува своето излагање Николоски.
По реакциите на Слободен печат, ВМРО-ДПМНЕ го повлече видео-спотот.
БЛИЦ: Уринирање спроти ветерот
Дерала: Сега, како пискливо ехо на тие наоди и извештаи, на сите потресни сведоштва, ги слушаме истите дијагнози, истите обвиненија од кои тие панично бегаат од правда. Тие, против кои има пресуди, истраги, докази… Со истите зборови им се обраќаат на тие што нив ги разобличија, без срам, без селекција, без труд. Само грабни, укради, ископирај и врати го истото, како да е твое и како тоа да се однесува на друг. Несфатливо!
ИЗЈАВА НА ДЕНОТ
Деркоски: Лицата со наполнети 18 години на денот на гласање ќе влезат во Избирачкиот список
ПОЛИТИЧКИ ОКЕЈ КОРАЛ
Понеделничка летаргија на македонската политичка сцена. Од поинтересните настани конечно се појави долгоочекуваното контра(нешто) на ВМРО ДПМНЕ. Токму кога помисливте дека заврши ерата на контрирање, историјата се повторува. Имено, Мицкоски повика на протест за правда кој е планиран за утре од 18 часот. Овој повик следува по минатонеделниот марш за правда кој го организираше СДСМ.
НЕ ПОМАЛКУ ВАЖНО
Независниот академски синдикат (НАкС) бара итно да се воспостават критериуми за финансирање на универзитетите и на научните институти како и потпишување колективен договор за регулирање на платите. За проблемите и предизвиците на финансирањето на високото образование и науката НАкС денеска организираше трибина.
Заложби за силна, стабилна и обединета Европа во мир преку целосна интеграција на Западниот Балкан во Европската Унија изразија денеска во Солун министрите за надворешни работи од регионот и од земји-членки на ЕУ кои граничат со регионот, на конференцијата на високо ниво „Од Солун до Загреб” на која учествува и шефот на дипломатијата Никола Димитров.
Со едно минутно молчење во почит на настраданите во вчерашната трагедија во Романовце, Советот на Општина Куманово едногласно го прогласи за утрешниот ден за ден на жалост и ги откажа сите активности и манифестации предвидени за утре. Градоначалникот Максим Димитриевски, изрази сочувство и вети поддршка и помош за настраданите.
ЦИВИЛНИ АКТИВНОСТИ
Со оглед на зголемениот интерес, како и можностите да се зголеми обемот на изборниот мониторинг, ЦИВИЛ ги повикува своите членови, поддржувачи и учесниците на семинарите за граѓанско новинарство, набљудувачите на претходните изборни процеси, како и сите заинтересирани полнолетни граѓанки и граѓани да аплицираат за краткорочни изборни набљудувачи.
Функционери и активисти на политички партии немаат право на учество на овој повик. Не е дозволено да се биде набљудувач на две организации истовремено.
Предност во процесот на избор за набљудувачи, како и секогаш, имаат членовите и поддржувачите на ЦИВИЛ, поранешни набљудувачи, како и оние што учествувале на семинарите за граѓанско новинарство.
СЛОБОДНА ЗОНА
За трогателниот напор на Антонијо Милошоски и објавувањето петарди прочитајте повеќе во денешната колумна на Сашо Орданоски – „Падна бомба од небото – и не утепа никого!“
За правдата и нејзината еволуција во корнерот на Зоран Иванов – „Динамична еволуција наместо судска револуција“
Маја Ивановска
во соработка со Биљана Јордановска и Дијана Тахири
