Иако Владата во минатонеделната стратешка програма „План за чист воздух“, во која борбата против загадувањето се воведува и промовита како стратешки приоритет, си постави цел да го подобри квалитетот на воздухот во Скопје во наредните две години за 50 отсто, македонските медиуми денес ја објавија информацијата од „Еуроњуз“, која се базира врз извештај на Европската агенција за животна средина, според кои, Македонија била земја со највисоко аерозагадување во Европа, во периодот 2015-2016 година
Според извештајот, густиот сообраќај и употребата на печки на дрва и фосилни горива за загревање го предизвикуваат опасното аерозагадувањето, кое се подрастично влијае врз здравјето на граѓаните. Според статистиките на ЕУ, во 2015, во Македонија биле загубени 1.469 животи поради загаденоста во 2015.
Партиите и денес продолжија со „престрелките“ со меѓусебни обвинувања. На обвинувањата на ВМРО-ДПМНЕ дека ниу едн од ветувањата на СДСМ кога беше опозиција во поглед на загадувањето на животната средина не е остварено, СДСМ излезе со соопштение во кое се вели дека „ВМРО-ДПМНЕ 11 годиниго игнорираше проблемот со загадувањето на воздухот и се посвети единствено на криминал, корупција и лично богатење на поединци“. Според СДСМ, „мерките како зголемување на инспекцискиот надзор на најголемите загадувачи, детектирање на дивите депонии, гасификацијата, придонесуваат за намалување на загаденоста на воздухот“, а се преземаат и акции „за рачно миење на градските улици и булевари за намалување на правта и ситните честички, и се субвенционираат трошоците на домаќинствата за набавка на печки на палети, што ги заменуваат нееколошките начини на греење“.
Не помина законот за амнестија за насилниците од 27 април
Предлог-законот за амнестија на лицата осомничени, обвинети и осудени за собраниските настани од 27 април 2017 година, поднесен од 28 пратеници од опозициската ВМРО – ДПМНЕ, денеска по скратена постапка во второ читање беше на дневен ред на 66. собраниска седница. Мнозинството од пратениците не го поддржаа предлог-законот. Минатата недела и Владата даде негативно мислење на предлог-законот а министерката за правда Рената Дескоска истакна дека законот дава премногу широка амнестија.
Од друга страна, 1ТВ денеска објави дека во Телото за помирување за инцидентите на 27 април е подготвен Предлог-законот за амнестија. Неофицијално, во законот, независната пратеничка група на ВМРО-ДПМНЕ предлага преквалификување на делото за директните учесници, а индиректните да бидат опфатени со целосна амнестија. Првиот состанок на кој ќе биде претставен Предлог-законот ќе се одржи во среда.
Јанакиески не сака да биде жртва на бегството на Груевски
Поранешниот министер Миле Јанакиески на денешната седница во Апелациониот суд на кој се разгледуваше жалбата по решението за одредување притвор, потенцираше дека при донесување на решението се прекршени три закони, дека е постапено е спротивно на праксата на Европскиот суд за човекови права и на членови на Европската конвенција за човекови права. Јанакиески побарал судот да го земе предвид и демантот од претседателот на Ѓорге Иванов кој негира содржината на службената белешка дека Јанакиески преку посредник побарал амнестија од него.
„Зошто би иницирал средба со претседателот преку посредник кога истиот ден сум се сретнал со него? Зошто воопшто посредник кога се познавам со претседателот десетина години?“, прашал Јанакиески.
Тој го оспори и тврдењето дека по бегството на Груевски, како негов поранешен соработник, исто така, би можел да избега. „Како што знаете јас го осудив неговото бегство во медиумите и реков дека сериозно може да тоа да им наштети на процесите каде и двајцата сме обвинети… Не треба да бидам казнет и жртвуван заради постапките на Груевски!“, рече Јанакиески.
Манчевски најави 66 милиони денари за реформи на администрацијата
Иако мотото со кое беа презентирани средствата од буџетот, беше „Повеќе пари за граѓаните”, соопштувајќи ги буџетските проекции за 2019 година, министерот за информатичко општество и администрација Дамјан Манчевски, најави дека буџетот на Министерството за идната година ќе биде 1,55 милијарди денари, а дека од нив, дури 1,2 милијарди, се наменети за финансирање на МРТ, Македонската радиодифузија и АВМУ, за да „ја планираат програмата и да бидат автономни во уредувачката политика“
2,4 милиони денари се предвидени за Електронскиот регистар на население.
Судот некоординиран, рочиштето за 27 април – одложено!?
Судијката Добрила Кацарска го одложи денешното рочиште за насилствотото во Собранието на 27 април, со образложение дека денешното рочиште нема да се одржи поради некоординираност на судот, и дека судењето ќе продолжи утре.
Причина за одложувањето било отсуството на обвинетиот Мунир Пепиќ кој во тој момент, иако бил спроведен од куќен притвор, бил во друга судница како обвинет и во рочиштето за случајот „Титаник“ за изборни нерегуларности.
„Датумите за овој предмет се закажани пред некое време, бидејќи се работи за притворски предмет. Во исто време е закажано рочиште за случајот ‘Титаник‘ каде како обвинет се јавува Мунир Пепиќ кој исто така е обвинет и во овој предмет. Не ми е јасно зошто е ваквото однесување и на што се должи ваквата некоординираност, но морам да го одложам денешното судско рочиште“, рекла судијката Кацарска.
Мите Грозданов замина во легендите
Познатиот македонски актер, доајенот Мите Грозданов почина во Скопје, на 75-годишна возраст. Грозданов работеше во Драмскиот театар од 1967 до пензионирањето во 2008 година, каде играше стотина улоги, но со децении работеше и во театрите во Струмица, Кавадарци, Гевгелија.. Во 40-годишната професионална актерска кариера, Грозданов публиката ќе го помни по улогите во „Партитура за еден Мирон“, „Болен Дојчин“, „Болва во уво“, „Јане Задрогаз“, „Цар Едип“, „Солунски патрдии“, „Рибарски караници“, „Црнила“, „Сомнително лице“… Играл и во филмовите: „Сутјеска“, „Планината на гневот“, „Залез над езерската земја“, „Истрел“, „Татко или колнати сме Ирина“, „Црно семе“, „Среќна Нова 49“…
Добитник е на „Златниот ловоров венец“ на Фестивалот на мали и експериментални сцени во Сараево (МЕСС) за насловната улога во претставата „Партитура за еден Мирон, наградата на фестивалот „Војдан Чернодрински“ во Прилеп за улогите Светозар во „Карамазови“ и Иљо М. во „Сенката“; сребрената плакета на Фестивалот на монодрамата за улогата во „Дрво на ридот“;
Иванов повторно во Турција
Претседателот Ѓорге Ивано престојува во работна посета на Република Турција, по повод учеството на Деветтиот „Самит Босфор“ во Истанбул. Иванов ќе одржи говор на отворањето на самитот, чија главна тема е „Одржување на мирот и развојот за сите“. Во рамки на работната посета на Република Турција, претседателот Иванов ќе ја посети Бурса, каде ќе одржи предавање на Универзитетот „Улудаг“.
Хазби Лика почнал да оди на работа во Владата
Вицепремиерот за спроведување на Рамковниот договор, Хазби Лика конечно почнал да доаѓа на своето работно место, а учествувач и на неколку владини седници, објавија медиумите. Претходно беше објавено дека наводно, поради кавга со лидерот на ДУИ, Али Ахмети, вицепремиерот Лика, кој со месеци не доаѓал во Владата.
„Не размислуваме за реконструкција при вакви сериозни парламентарни процеси. Секако, ако некој министер не доаѓа на Влада – логично е дека Владата треба да седне да размисли тоа да се промени. Разговараме со коалициските партнери кои споделиле одговорност со нас во делот на другите ресори ако се случат такви потреби, па ако некаде немаме ефекти, знаеме како“, изјави премиерот Заев.
К. С.