ЦИВИЛ ја покрена Иницијативата #КрајЗаРасипништвото со барање сите привилегии на функционерите, именувани или избрани на локално и централно ниво да се укинат, односно да се редуцираат до ниво што е прифатливо за една сиромашна земја која се декларира како социјална држава, според Уставот.
Иницијативата започна со соопштение на ЦИВИЛ на 14 мај, за потоа, организацијата, во присуство на голем број медиуми, да достави барања до парламентот на 17 мај, во пет минути до 12 часот. Неколку политичари, меѓу кои и Претседателот Стево Пендаровски, ја дадоа својата поддршка веднаш и во деновите по почетокот на иницијативата.
Исто така, ЦИВИЛ организираше и трибина „Крај за расипништвото“ на 5 јуни каде заинтересираните граѓанки и граѓани имаа можност подетално да се запознаат со барањата на ЦИВИЛ кои се однесуваат на намалување и укинување на привилегиите на јавните функционери.
Иницијативата #КрајЗаРасипништвото во нејзината онлајн верзија до сега ја потпишале над 2.500 луѓе. Ќе биде достапна за потпишување до почетокот на септември. По завршувањето на петицијата, ЦИВИЛ ќе ги интензивира активностите околу Иницијативата и јавно ќе побара од институциите, пред сѐ, од Собранието да преземат конкретни чекори за укинување на привилегиите што скапо ги чинат граѓанките и граѓаните. „Можеби не сме први што зборуваат на оваа тема, но ќе бидеме последни!“ – не еднаш изјави Џабир Дерала, претседател на ЦИВИЛ, со цел да се укаже дека ЦИВИЛ не одстапува од барањата до нивното остварување.
Што бара ЦИВИЛ и потписниците на петицијата #Крај за расипништовото?
Бараме:
- Укинување на апанажите на било кое ниво, за било која позиција.
- Укинување на доживотните пензии за поранешните претседатели, до моментот кога тие исполнуваат услови за пензија, соодветно на примањата што ги имале во текот на работниот век.
- Укинување на парични и други надоместоци за сите управни одбори, односно позицијата во тие и слични тела треба да биде почесна, а не платена.
- Укинување или спојување на државните агенции, со намалување на бројот на вработени. Бараме укинување на сите привилегии што се поврзани со користење службени возила, репрезентации, обезбедување на функционерите и други прескапи привилегии.
- Драстично намалување на патните трошоци на функционерите, поточно, обезбедување средства во висина на цената за јавен превоз.
- Да се воспостави пракса на забрана за набавка на службени возила од средна и висока класа.
- Укинување на дискреционите овластувања на функционерите.
Ова се дел од барањата што ЦИВИЛ ги достави и до пратениците во Собранието, но и ги презентираше пред јавноста.
„Споделете ја оваа Иницијатива со своите пријателки и пријатели, разговарајте и коментирајте. Придонесот на секој поединец е од непроценлива вредност. ЦИВИЛ ви благодари за поддршката!“ е пораката што ЦИВИЛ ја упати до своите поддржувачи на Фејсбук и на Твитер.
ЦИВИЛ Тим за комуникации
Петиција до Собранието: Крај за расипништвото
