На интернет медиумите и на социјалните мрежи беше упатено предупредување за Фејсбук страницата „Следиме“ за која се наведува дека е извор на манипулации и дезинформации. Според податоците што се споделени за оваа Фејсбук страница, се работи за извор на лажни вести и дезинформации. Фејсбук страницата беше подложена на детална анализа и од мониторинг тимот на ЦИВИЛ кој неодамна започна со правење регистар на генератори на лажни вести и говор на омразата. Оваа Фејсбук страница е ставена во категоријата Турбо генератори на лажни вести и говор на омразата.
Се забележува дека во неколку медиуми се наведуваат примери за начинот на функционирање на Фејсбук страницата „Следиме“. Мониторингот на ЦИВИЛ бележи дека многу често, лажните вести, манипулативните содржини, потпалувачки објави и говор на омразата, прво се појавуваат на Фејсбук страници како оваа или од лични профили на Фејсбук. Најчесто се работи за лажни профили на Фејсбук и на Твитер, но не е ретка појавата и јавни личности и политичари да се впуштат во ширење на ваквите содржини.
Во овој извештај пренесуваме неколку примери што се издвоени и во други медиуми, а кои Фејсбук страницата „Следиме“ ги пласира, а дел од познатата медиумска групација, ги презема и мултиплицира во јавноста.
Еден од најновите примери на ширењето на лажни вести е објавувањето на стара фотографија од 2019 година, објавена на 4 јуни годинава, на која директорката на УЈП, Сања Лукаревска е на фризер. Преку „Следиме“, јавноста се манипулира дека тоа се случува сега, додека треба да биде во самоизолација.
Оваа вест ја споделуваат повеќе портали, страници профили на социјалните мрежи, кои постојано, подолго време наназад, учествуваат во оркестрирано и масовно ширење на дезинформации, дел од специјална хибридна војна на познати центри на моќ во земјава, но и надвор од неа, чија цел е нарушување на стабилноста и безбедноста на државата.
Дека ова не е првпат „Следиме“ да учествува во овие оркестрирани манипулации на јавноста, сведочат и други објави на оваа ФБ страница.
„Следиме“ ја објави дезинформацијата дека Грција воведува таргетирана забрана за влез кај нашите соседи за неколку општини од Северна Македонија на 3 јуни 2020 година.
На оваа ФБ страница се бележи голем број објави кои се очигледно тенденциозни и манипулативни. Дел од нив се лесно препознатливи лажни вести, а во еден дел се забележува манипулација чија цел е поттикнување меѓуетничка омраза, обиди за дискредитација, навреди и говор на омразата кон јавни личности или функционери, претежно од редовите на Социјалдемократскиот сојуз.
Од таквите содржини, издвојуваме уште две објави на оваа ФБ страница. На првата, објавена на 9 мај 2020 година, мета на едната е лидерот на СДСМ, Зоран Заев. Објавата на „Следиме“ чија мета е Заев претставува комбинација од говор на омраза и манипулација на јавноста.
Мета на „Следиме“ беше и министерот за здравство, Венко Филипче, на 12 мај 2020 година.
Јавноста често е жртва на лажните вести од лажните вести, манипулации и ширење на говорот на омразата. ЦИВИЛ веќе долго време ги следи овие појави и секојдневно објавува извештаи во кои ваквите содржини ги разобличува, а во својата комуникација со јавноста, ги повикува граѓанките и граѓаните да се спротивстават на ваквото штетно дејствување со пријавување и преиспитување на секоја содржина во медиумите и социјалните мрежи. Исто така, ЦИВИЛ континуирано ги повикува институциите да ги спречат и санкционираат центрите во кои се продуцираат и од кои се дистрибуираат овие содржини.
Мониторинг тим на ЦИВИЛ
