пишува: ЏАБИР ДЕРАЛА
Ги злоупотребуваат своите позиции во општеството и во системот, за да се стекнат со уште повеќе пари и моќ. Им слугуваат на центри на моќта кои работат против македонските национални интереси. Антипатриоти се, а цел живот вреват за патриотизмот зад кој ги кријат своите криминални постапки, злокобните ставови и радикализмот. Внесуваат поделби, страв и омраза меѓу луѓето секаде каде што можат. Ги делат луѓето по етничка и верска припадност, по социјална и партиска линија, ги понижуваат жените, контаминираа генерации деца со неизмерни глупости. Неодговорни се. Крајно неодговорни.
Тие би да нема вистински суд, туку судот на „народот“, а под „народ“ се подразбираат себеси и своите тесни интереси, себичноста. Немаат тие ништо со „народот“, освен што сакаат да го експлоатираат. Тие би да нема владеење на правото, затоа што така ќе завршат на обвинителната клупа. Не би сакале да ја видат Северна Македонија интегрирана во ЕУ, не сакаат членство во НАТО, не сакаат попис, не сакаат да гласаат за економски мерки за ранливите и за стопанството, не гласаат за антикорупциската стратегија, бидејќи хаосот, сиромаштијата, изолацијата и стравот се нивната храна…
Висат по ходници и бифеа и им ги трошат парите на даночните обврзници и блокираат сè што може да се блокира во парламентот… И трујат.
Ги злоупотребуваат своите функции за да ги разнишаат демократските темели на сопствената земја. И во војна се спремни да ја вовлечат земјата, за да ги задоволат сопствените интереси и да ги лечат сопствените фрустрации. Колку пати да се повтори ова за да стане јасно?
***
Оној, насаден на чело на најголемата националистичка партија, цимолеше да се сретне со премиерот. Демек, да го одложи пописот и потоа да ликува дека тој е заслужен за одложувањето. Не тој што му попушти, не Комисијата за заразни болести, туку тој. Бре! А веднаш потоа продолжи со црната пропаганда и блокадите.
Другион не заслужува ниту да се коментира. Како манијак што плаши деца по паркови и темни ќошиња, со поганиот јазик исплазен, секој ден пцуе и навредува. Гнаса од човек.
***
Навистина, како не се најде еден паметен, образован, чесен и искрен човек во тие разбојнички гнезда што цицаат пари од буџетот, а изгледа дека имаат и купишта црни пари за пропаганда против иднината на оваа земја? Та нели повеќето од нивните шефови се професори или носат разни академски титули, а во извршните и советодавните тела имаат разни академски „величини“? И азилантот, другарчето на Виктаторот од Будимпешта им стана доктор на науки, нели? Зошто тогаш толку глупост и црнила, шлајфување во калта на омразата и деструкцијата?
Се разбира, ова се реторички прашања на кои одговорот е едноставен. Да се носи академска титула и да се биде шеф во оваа земја, не значи дека некој е паметен. Па дури и да е паметен, не значи дека нема криминален ум. Се работи за одговорноста и за вредностите на човекот. И, ако се најде некој што со одговорност и чест ги употребува своите вештини и знаења за да поита кон иднината, веднаш го ставаат на стрелачкиот ѕид на пропагандата.
И, да не пропуштиме. Има паметни, образовани, чесни и искрени политичари и во десничарските политички кругови. Каде се? Исклучени од членството на партијата, распнати на Фејсбуковата Голгота.
Нема ништо достоинствено, ниту чесно и одговорно во тоа да се биде на чело на партија која постојано ја попречува работата на парламентот, па ги блокира дури и одлуките за поддршка на најранливите во општеството. Нема ништо чесно, немајќи идеи или имајќи само една идеја – богатење, да се крадат идеи и да се припишуваат сопствените валканици на други. Тоа не е ни мангуплак, туку обично уличарско, гангстерско однесување. Тие што израснале на градскиот асфалт, со рокенрол не само во ушите, туку и во срцата, знаат што е разликата.
НАПРАВИ РАЗЛИКА: ПОЧИТУВАЈ ГИ РАЗЛИЧНОСТИТЕ
Текстот е личен став на Авторот.
