Во врска со етнички мотивираните инциденти во Кочани во кое мета на радикални структури е ромската заедница, ЦИВИЛ испрати прашања до повеќе институции на 19 април:
Кој е вашиот коментар во врска со нарушените односи, тензиите и инцидентите меѓу македонската и ромската заедница во Кочани? Што ќе преземете Вие и Вашето министерство за да се подобри состојбата меѓу македонската и ромската заедница во Кочани? Дали имате сознанија за слични состојби во земјата? Во што се состојат проблемите и што преземате Вие во врска со тоа?
Прашањата беа испратени и до Министерот за политички систем и односи меѓу заедниците, Артан Груби, кој воедно е и прв вицепремиер. Одговор стаса од Кабинетот на Груби на 22 април, во 18 часот. Го пренесуваме во целост:
Ги осудуваме немилите изолирани настани на етничка и била која друга основа. Владините политики за еднакво општество на рамноправни граѓани се покажаа како успешни и тоа се рефлектира во односите помеѓу сите заедници во земјата, во насока на изградба на кохезивно општество на сите граѓани интегрирани во НАТО и ЕУ.
За изолираните инциденти го повикуваме МВР и Јавното обвинителство да го расветлат случајот.
За конкретниот случај ќе стапиме во контакт и ќе разговараме со градоначалникот на општина Кочани и општествените локални лидери со цел да дадеме придонес за целосно почитување на правата на сите граѓани во земјата и да се стави крај на дискриминацијата по сите основи.
Тимот на ЦИВИЛ го посети Кочани на 21 април и се сретна со градоначалникот на Кочани, Николчо Илијев кој вети дека нема да дозволи да се нарушат меѓуетничките односи и секој проблем ќе го решава со дијалог и разговор.
Организацијата остро го осуди насилството во општина Кочани побара од институциите веднаш да го расчистат случајот и секој што е инволвиран да добие соодветна казна.
Одговор на прашањата сѐ уште се очекува од Министерството за труд и социјална политика, Дарко Стојчевски, советник од ВМРО-ДПМНЕ во Општина Кочани и од независниот советник Венко Крствски кој на својот Фејсбук профил за инцидентите напиша „око за око, заб за заб“.
Б. Јордановска
