пишува: ЏАБИР ДЕРАЛА
„Гледам едно големо ЗА наспроти едно мало ПРОТИВ“, рече Националниот координатор за стратегиски комуникации Марјан Забрчанец на дебатата на ЦИВИЛ со „сообраќаен“ наслов – „Автопатот со факти, одговорност и решителност наспроти беспаќето на опасните дезинформации“. Ова е нов пристап, ексклузивно промовиран на јавниот настан на ЦИВИЛ (ами каде?) и веројатно ќе биде окосница на тоа што ќе се случува во јавните комуникации во претстојниот период.
Конечно, во овој став се навестуваат нови перспективи и пресврт во распламтената хибридна војна што се одвива глобално и ни оддалеку не ја одминува нашата земја. Ова е почеток на една нова фаза, каде што наративите во јавниот дискурс од корен може да се променат.
Очекувам црната пропаганда да го заземе своето заслужено место – во калливите ровови и темните подруми. Со други зборови, да прејде во дефанзива.
Време е за точни информации и за борба на мислења, не за надмудрување и деструкција. Време е да ѝ се спротивставиме на искривената реалност што ја создава црната пропаганда, со избирање на поинаков, проактивен и афирмативен пристап.
Наместо дефанзива, бескрајно и бесполезно објаснување и препирки со подземните фабрики за дезинформации, новиот пристап отвора можност идеите, настаните и процесите да го добијат заслуженото место во јавната комуникација, преку доследно претставување, транспарентно и одговорно. Впрочем, самиот наслов на настанот тоа и го сугерира и на извонреден начин беше „пресретнат“ од моите соговорници Забрчанец, Илиев, Стојчевски и Петрески.
На ист панел се сретнаа и ги здружија своите експертизи експерт за комуникации, одбрана, меѓународно јавно право и медиуми. Ситуацијата е сложена, демократијата е под постојан напад од „непредвидлив и недофатлив непријател“, но одговорот е формулиран и капацитетите се ставени во функција. Нападот е комплексен, таков е и ќе биде одговорот.
Во само еден час може да се соберат само неколку кратки цртички и пораки, наспроти непрегледното пространство од информации, знаења и искуства што се прибирани со години во битката со дезинформациите и хибридните закани. И кои експертите со кои разговарав, без сомнение, ги поседуваат. Како што стојат работите, постојат одлични шанси Северна Македонија да биде лидер во креирање нови и успешни приказни во борбата против дезинформациите и хибридните закани.
Не се работи само за менување на наративите, туку и на пристапот. Нема причина зошто нашиот ден би требало да го одбележува препирката со дистрибутерите на дезинформациите и црната пропаганда. Тоа не е исклучено, но нема ниту една видлива и разумна причина да бидеме определени и дефинирани (само) преку нашата борба против дезинформациите. Напротив, нас треба да нè определуваат точните информации и вести за тоа што претставува секој од нас, што е суштината на настаните и процесите, што сме ние, а не што претставува нашиот одговор против црната пропаганда.
Кога ќе запалите светло, сигурно не се занимавате со тоа каква била собата кога во неа било мрачно, туку го правите тоа поради кое сте влегле во собата. Кога планирате да креирате прогресивно општество, носите решенија и ги спроведувате, тие самите по себе се доволно добри одговори на измислиците од креаторите на црната пропаганда.
