ВЕСТ НА ДЕНОТ: ЦИВИЛ разобличи разгорување на верска и меѓуетничка нетрпеливост
Отакако вчера ЦИВИЛ Медиа алармираше дека е злоупотребен идентитетот на писателот Наум Попески, денес веќе не постои лажниот Фејсбук профил со истото име, преку кој се ширеше експлицитен говор на омраза поттикнувајќи етничка и верска нетрпеливост.
ИЗЈАВА НА ДЕНОТ: Неверојатно е како еден ум може да се служи со толкава омраза
„Ова првпат ми се случува и се чудам како може еден нормален ум да користи такви грозотии, да се служи со таква омраза тоа е неверојатно. Ова се монструми и државата треба да ги санкционира за да не нè вознемируваат. Тоа не е својствено за мене, јас ги сакам сите и немам проблем со никого. Кога прочитав што се пишува во мое име, јас се згрозив, и не можев да спијам цела ноќ, едвај чекав да се раздени за да одам да пријавам“, изјави насолзен за ЦИВИЛ Медиа писателот Наум Попески кој беше крајно вознемирен по злоупотребата на неговиот профил на социјалната мрежа Фејсбук.
ЕДИТОРИЈАЛ
„Познатиот детски поет, со солзи во очите, фрлен во челуста на црната пропаганда на радикалите, раскажа за неговата потрага за заштита од институциите. Тој е решителен и упорен во таа потрага. Не смее да остане сам. Бидејќи секој од нас може да биде следната мета, ако веќе не е“ – пишува Џабир Дерала во денешниот едиторијал под наслов „Крајно нечовечна и криминална постапка на радикалните структури“.
МОНИТОРИНГ И АНАЛИЗИ
Над 120 случаи на оркестриран политички и етнички говор на омраза и лажни вести во мај и јуни
Оркестрираното ширење на медиумски содржини со говор на омраза и лажни вести на социјалните мрежи продолжува со несмалено темпо. И во изминатите два месеци, мониторинг тимот на Цивил забележа над 120 такви содржини, во кои доминираат претежно говорот на омраза кон личности од политиката, етничкиот говор на омраза, но и организираното ширење на лажни вести.
Фокусот на Мониторинг тимот на ЦИВИЛ во периодот мај-јуни 2021 беше структурираното следење на говорот на омраза и лажните вести на социјалните мрежи и електронските медиуми. Во овој период детектирани се над 120 содржини на медиумски онлајн платформи и на социјалните мрежи, од кои Мониторинг тимот на ЦИВИЛ обработи 40 случаи. Повеќето беа содржини кои ширеа и поттикнуваа говор на омраза, а содржините за ширење на лажни вести беа во помал, но не помалку значаен број.
Анализата на Мониторинг тимот на ЦИВИЛ за мај и јуни 2021 можете да ја прочитате ТУКА.
ФЛЕШ ВЕСТИ
ТОРТУРА Мијалков и шестмина припадници на поранешната единица „Алфа“ ослободени од овинението за „Тортура“.
ОРДЕН ЗА ЗАСЛУГИ Претседателот Стево Пендаровски денеска во претседателската резиденција со високо државно одликување „Орден за заслуги за државата“ ќе ги одликува постхумно писателот Горан Стефановски, пејачот и актер Зафир Хаџиманов и професорот Ремзи Несими, како и претседателот на Ракометната федерација на Македонија, Живко Мукаетов.
УНЕСКО Охридскиот регион доби две години рок да ги исполни препораките на УНЕСКО и да избегне поместување на Листата светски богатства во опасност.
БИЛАТЕРАЛНА СОРАБОТКА Северна Македонија и Португалија првпат почнуваат соработка во одбраната.
ЕКОНОМИЈА За 4,7 отсто e повисок предвидениот раст на приходите со ребалансот на Буџетот.
ЈАВЕН ПОВИК Јавен повик за дигитален асистент за олеснување до пристапот до програмите за државна економска помош.
МИНИ ШЕНГЕН Вучиќ на 28 и 29 јули во Скопје на Економски форум со претставници на над 175 српски фирми.
ИНИЦИЈАТИВА: НАПРАВИ РАЗЛИКА, ПОЧИТУВАЈ ГИ РАЗЛИЧНОСТИТЕ
Перо Арсовски, еден од најдобрите македонски актери, со своето учество во иницијативата на ЦИВИЛ „Направи разлика: Почитувај ги различностите“ преку видео порака им порачува на граѓанките и граѓаните дека различностите се вистинско богатство на нашето мултикултурно општество.
Мултиталентираната пијанистка, професорка и спортистка Дуња Иванова, во видео порака за Иницијативата „Направи разлика, почитувај ги различностите“ зборува како таа ги доживува различностите, преку сетилата, музиката и филозофијата.
ЦИВИЛНИ АКТИВНОСТИ
Голема регионална конференција за нападите врз демократијата и човековите права во Западен Балкан
„Напади врз демократијата и човековите права: Граѓанските организации во поддршка на општествата од Западен Балкан кои се соочуваат со дезинформации, говор на омраза и хибридни напади“ е регионална конференција, организирана од ЦИВИЛ, во соработка со Балканскиот форум, членки на Платформата за граѓанско општество за демократија и човекови права (ПГО).
Конференцијата ќе се одржи на 28 јули 2021 година, со почеток во 11 часот, во хотел Парк Резиденс & Спа во Скопје.
Оваа конференција ќе биде прва во серијата настани што ќе ги организираат членките на ПГО до декември 2021 година.
ЦИВИЛ ќе биде домаќин на 150 минутна конференција со комбинирано учество (преку Интернет и физичко), поделена на две сесии. Во секоја од сесиите се поканети истакнати експерти и актери од граѓанското општество да зборуваат на прашања поврзани со темата на Конференцијата, по што ќе следи дискусија.
Д. Тахири
