Шекеринска: Северна Македонија е карактеристична со различностите и затоа мора да работи многу повеќе на својата внатрешна интеграција за да се справи со насилниот екстремизам или тероризам
Што се однесува до политиките на градење на структурата на Одбраната, начините и пристапот во доменот на создавањето на општествената кохезија, што е важен фактор во градење на отпорноста на општеството кон екстремизмот и тероризмот, Министерката Шекеринска вели дека „Армијата е една од институциите која мора да биде симбол за интеграција, мора да биде симбол на кохезија, бидејќи е присутна на различни места“
Министерката за одбрана, Радмила Шекеринска во изјава за ЦИВИЛ МЕДИА, зборува за учеството на Армијата и на Министерството за одбрана учествува во доменот на контролата на оружјето и спречувањето на тероризмот и екстремизмот.
„Контролата на оружјето, радикализацијата, насилниот екстремизам или тероризам, се процеси кои меѓусебно се хранат, и затоа, борбата против нив треба да биде и добро координирана, мора да биде логична. Министерството за одбрана не е првата институција која се занимава со оваа борба, но како дел од Националниот комитет за спречување на националниот екстремизам и борба против тероризмот, учествуваме во напорите државата да се справи со опасноста која што станува глобална и којашто е стандардна тема на сите состаноци на министри за одбрана, министри за внатрешни работи, и во рамки на НАТО“ – вели Министерката Шекеринска.
Сите сојузници на НАТО, каде што спаѓа и нашата земја, Република Северна Македонија, се повикани да учествуваат во Програмата за акција на ОН за спречување, борба и искоренување на недозволената трговија со мало и лесно оружје (МЛО) во сите нејзини аспекти, која се стреми да го подобри националното законодавство и контролата врз недозволеното мало и лесно оружје. Во таа смисла, и Министерката за одбрана, Шекеринска, нагласува дека тероризмот е една од клучните опасности која НАТО ја дефинира како главен предизвик во сферата на безбедноста.
Радмила Шекеринска (фото: Д. Муратов/ЦИВИЛ)
„Затоа, голем дел од нашите армиски припадници се обучуваат за борба против екстремизмот и тероризмот. Тие учествуваат и во изработка на стандардните оперативни процедури, заедно со другите институции. Еден дел од нашите специјални единици, имаат фокус во обуката за борба против тероризмот. Тоа значи дека Армијата, заедно со Службата за воено разузнавање во Одбраната, се главните елементи коишто би требало да ни ги обезбедат сите информации и инструментите како да се бориме против овие современи зла“ – објасни Шекеринска.
Што се однесува до политиките на градење на структурата на Одбраната, начините и пристапот во доменот на создавањето на општествената кохезија, што е важен фактор во градење на отпорноста на општеството кон екстремизмот и тероризмот, Министерката Шекеринска вели дека „Армијата е една од институциите која мора да биде симбол за интеграција, мора да биде симбол на кохезија, бидејќи е присутна на различни места“.
Радмила Шекеринска (фото: Д. Муратов/ЦИВИЛ)
„Припадниците на армијата доаѓаат од сите села и градови низ државата. Таа е многу корисна институција за создавање на тој тип на општествена кохезија. Правичната застапеност уште од самиот почеток, прво се промовираше во армиските и полициските редови. Така се намалуваат шансите за радикализација внатре во структурите, така се влијае на намалување на говорот на омраза, така се работи исто и на кршење на стереотипите“ – вели Шекеринска.
Ваквиот пристап има силно влијание врз градењето на системот на безбедноста, за можностите земјата да се одбрани од современото зло на екстремизмот и тероризмот.
„Држава како Северна Македонија којашто е навистина карактеристична со етничките, јазичните, религиските разлики, мора да работи многу повеќе на својата внатрешна интеграција, за да се справи со злото наречено насилен екстремизам или тероризам. Мислам дека тоа и во армијата, и во безбедносните структури го сфативме и го работиме многу сериозно“ – заклучи Министерката за одбрана, Радмила Шекеринска.
