Состојбата во окупираните територии во источниот дел на Украина и на полуостровот Крим е прилично напната. Главната разузнавачка агенција при Министерството за одбрана на Украина неодамна информираше дека во единиците на оперативното групирање на руските окупациски сили на привремено окупираната територија во Доњецката и Луганската област продолжуваат активни дејствија за воена подготовка.
Изминатава недела, единиците на првиот (Доњецк) и вториот (Луганск) армиски кор одржуваат часови за тактичка и огнена обука, како и обука за контрола на огнот на артилериските единици во рамки на таканаречениот „Обединет ден на огнот“.
Разнузнавачките извори јавуваат дека командантите на вооружените сили на Руската Федерација постојано ги засилуваат пропагандните дејствија и го зголемиле бројот на агитациони тимови за регрутирање меѓу населението на привремено окупираните територии во Доњецката и Луганската област.
Воените комесаријати на руските окупациони администрации во двете области ја интензивираат својата работа. Тие на ангажираниот персонал му ја соопштиле потребата да се пријават за воена служба, а на поранешниот воен персонал на окупаторските сили му наложиле да ја обнови воената служба.
На првите борбени линии, окупаторите вршат инженерски работи за обновување на објекти за фортификација, додека истовремено ги зголемуваат минските полиња. Руските сили на теренот поставуваат противпешадиски мини направени во Русија, а кои се забранети со низа меѓународни конвенции.
Претходно, украинскиот министер за одбрана, Олексиј Резников, соопшти дека руската армија во моментов на копно има распоредено 112.000 војници во непосредна близина на украинската граница. Заедно со поморската и воената воздухопловна компонента, руските сили во близина на украинските граници бројат околу 130.000 војници.
Џ. Д.
